Во сабота, на 30 мај, со почеток во 17 часот, во Домот на култура „Билјана Беличанец“ во Кисела Вода ќе се одржи свечената промоција на најновата сликовница „Големиот сон“ од авторот Денис Јанкуловски – Космонаутко, со илустрации на Алексеј Костовски. Настанот се организира во соработка со Домот на култура „Билјана Беличанец“.
Сликовницата „Големиот сон“ доаѓа пред публиката со веќе освоено значајно признание. На неодамнешниот Саем на книгата, ова дело го освои првото место за поттикнување општествена одговорност, награда што ја доделува Македонската асоцијација на издавачи (МАИ).
Во своето образложение, жири-комисијата потенцираше дека ова дело е напишано со цел да поттикне прифаќање на различностите, кои не смеат да бидат пречка во остварувањето на соништата. Авторот Јанкуловски е посочен како докажан борец за правата на децата и лицата со попреченост и активен гласноговорник за нивна инклузија во општеството.
Приказна за девојчето Тина и нејзината љубов кон музиката
Како што појаснуваат од издавачката куќа „Прозарт медиа“, оваа сликовница е инспиративна приказна за девојчето Тина, која ја сака музиката повеќе од сè и пее насекаде во својата сина количка со нотички на тркалата. Нејзиниот најголем сон е еден ден да стане вистинска музичка ѕвезда, а кога добива покана да настапи на фестивал, таа учи дека со храброст, добри пријатели и верба во себе, секој сон може да стане реалност.
На претстојната инклузивна промоција, авторот Јанкуловски и илустраторот Костовски накратко ќе го претстават своето дело. Како специјални гости на настанот ќе настапат познатото дуо Дац и Александар, потоа Марија Савеска, како и Ана Витанова, која послужила како директна инспирација за главниот лик во сликовницата.
Објавувањето на „Големиот сон“ е финансиски поддржано од Министерството за култура и туризам, „Зегин“ и Фондацијата „д-р Верица Механџиска“, „Шпаркасе Банка“, „Пакомак“, „Сити Флауерс“ и „Дата Понс“.
