Премиерот Христијан Мицкоски и опозициската СДСМ влегоа во остра полемика околу финансирањето на музичките спектакли по повод 35-годишнината од независноста. Додека премиерот тврди дека настапите на светските ѕвезди го чинеле државниот буџет нула денари, од СДСМ возвратија дека прославата е индиректно платена со народни пари преку Државната лотарија.
Оценувајќи го изминатиот период како историско лето за паметење, Мицкоски истакна дека низата масовни настани низ државата, на кои настапија Стив Аоки, Пол Окенфолд, Пол ван Дајк, Хосе Карерас и Дејвид Гета, биле целосно организирани со поддршка на општествено одговорни компании. Премиерот посочи дека има „лоша вест“ за сите кои ширеле лажни информации, повикувајќи ги граѓаните слободно да проверат на платформата „Отворени финансии“ дека од државната каса не е исплатен ниту еден денар. Според него, актуелната Влада се однесува домаќински и секој буџетски денар се троши транспарентно.
Сепак, од опозициската СДСМ ваквото објаснување го оценија како манипулативно. Од партијата реагираат дека прославата била финансирана од дивидендата на Државна лотарија, посочувајќи дека бидејќи компанијата е во државна сопственост, тоа се всушност пари на граѓаните. Според СДСМ, не постојат „нула денари“ трошок, туку станува збор за класично префрлање на парите од еден џеб на државата во друг.
Опозицијата упати и жестоки критики за приоритетите на власта. Тие обвинуваат дека додека државата се соочува со проблеми и се најавуваат нови задолжувања од милијарди, а притоа нема пари за плати, пензии и земјоделци, Владата троши средства на спектакли кои лажно ги претставува како бесплатни. Од СДСМ порачаа дека граѓаните гледаат каде одат парите и знаат дека тврдењето за нула денари е само уште една лага.
