Мицкоски сега смета дека датумот за предвремени парламентарни избори не е приоритет, туку дека прво треба да биде постигнат договор за Законот за Јавно обвинителство. Неговата партија сега го промовира ставот дека треба да се зборува за закон што ги штити принципите, а не индивидуите.
Оваа изјава звучи како ехо на низата претходни изјави на Министерката за правда, Рената Дескоска која на преговорите меѓу работните групи на двете најголеми партии повлече јасна црвена линија: стандарди и правда. Таа линија цврсто ја држи и премиерот Заев. ВМРО-ДПМНЕ упорно го одолговлекуава и опструира процесот, барајќи од СДСМ да се откаже од истрагите за криминалите на високите функционери на претходната влада.
Премиерот Заев, за време на неговиот престој во Њујорк, каде што учествуваше во работата на 74. Заседание на ОН, изјави дека очекува власта и опозицијата да се договорат за Законот за јавно обвинителство пред Самитот на ЕУ. Одлука за почеток на преговорите треба да се донесе на 18 октомври, како што беше претходно објавено.
Според Заев, власта ќе создаде услови за продолжување на предметите на СЈО, што ќе обезбеди правда во земјата, а тоа е еден од условите што ги поставува и меѓународната заедница.
Предвремени избори можат само да ѝ наштетат на државата во процесот на евроатлантските процеси. Тоа е ставот кој и премиерот Заев и голем дел од експертската заедница и граѓанските организации го повторија повеќе пати во изминатиот период.
Џ. Дерала
