Еспресото го пиете со: ЏАБИР ДЕРАЛА
Во потпишувањето на Свечената изјава на новоназначените министерки и министри во Владата не би требало да има ништо посебно. Текстот е стандарден и во него новите функционери се обврзуваат дека ќе ги вршт своите функции совесно и одговорно, како и дека ќе ги почитуваат законите и Уставот на Република Северна Македонија. Така е, нема ништо проблематично до моментот кога ќе се сетиме на Мицкоски и неговата партија кои спроведуваат жестока кампања и континуирано го негираат Уставот и името на македонската држава.
Лицемерието на Мицкоски и вемерето се гледа и при потпишувањето на Свечената изјава за стапување во функцијата. Министрите од неговата партија се потпишаа дека ќе бидат функционери на Република Северна Македонија и дека ќе ги почитуваат законите и Уставот на Република Северна Македонија. На три места, во само неколку реда текст го пишува името на државата чие име го негираат и против која работат со полна пареа. Но, не им пречи да станат дел од Владата на таа држава.
Зошто?
Затоа што сѐ ќе дадат за пари и функции!
Читајќи го ова, некој со право ќе забележи дека ова е најмала работа со која тие се согласуваат, а дека на овие големи никогаш-северна „јунаци“ ни око не им трепнува кога се потпишуваат на платите, дневниците и другите бенефиции што ги добиваат од буџетот (парите на граѓаните) на Република Северна Македонија. Ни оддалеку не им е проблем да подигнат милионски суми од буџетот на Република Северна Македонија и да ги трошат на кампањи против истата таа држава.
Што треба да им кажеме сега?
ПС. Можеби некој од новите функционери на техничката влада ќе кажат дека се непартиски кадри, експерти, независни… Со сета почит, но треба да знаат која и каква дружина им ја овозможува 100-дневната функција во техничката влада на Република Северна Македонија.
