Партијата „Има таков народ“ (ИТН), на бугарскиот шоумен Слави Трифонов денеска изгуби уште еден пратеник – тоа е шестиот што ја напушти партијата откако таа излезе од владејачката коалиција. Пратеникот Кирил Симеонов од Варна денеска во емоционален говор во парламентот рече оти му е срам што вчера гласал заедно со ГЕРБ и ДПС за разрешувањето на претседателот на бугарскиот парламент, Никола Минчев, јави бугарскиот новински сајт mediapool.bg, пренесува Мета.мк.
Од вкупно 239 пратеници, 125 гласаа „за“ разрешување на Минчев вчера, 113 беа против, а еден пратеник од „Продолжуваме со промената“, партиската алијанса на премиерот Кирил Петков, беше воздржан. Барањето за разрешување на Минчев беше поднесено завчера од страна на пратениците на ГЕРБ, ДПС, „Има таков народ“ (ИТН) и „В’зраждане“ (Преродба).
Пратеникот Симеонов денеска порача дека влегол во политика за да се бори против системот, против статус кво-то, но излегло дека вчера гласал баш „за системот“.
„Во политиката влегов без да имам родители – партиски кадри, без некој да ме подджува, без бизнисмени зад мене. Кога се видов со Слави Трифонов, тој ме праша „зошто си тука, за што се бориш?“. Јас му реков „тука сум за да се бориме против системот, против статус кво-то. Вчера гласавме заедно со тој систем и ми е срам поради тоа“, рече тој.
На неколку дена пред гласањето доверба на неговата влада, кое е на иницијата на ГЕРБ, бугарскиот премиер Кирил Петков во интервју за бугарски „Капитал“ прогнозира дека до 15 пратеници на ИТН не се уверени дека „треба да ги следат Слави и Тошко (Јорданов)“. Според Петков, кога владата би имала поддршка од такви пратеници, тој би се чувствувал покомфорно.
Петков појасни дека на пратениците од ИТН што сега во моментов ја поддржуваат владата, би им предложил места во идни листи на неговата партиска коалиција „Продолжуваме со промената“ (ПП), но не како трговија.
Светлин Стојанов, еден од петте пратеници што досега ја напуштија ИТН и дејствуваат како независни, исто така вели дека барем уште петмина пратеници би ја напуштиле партијата „на Слави и Тошко“, но тоа не го разоткриле при гласањето за разрешување на претседателот на парламентот за да не бидат нападнати, пренесува mediapool.bg.
„Барем уште петмина се подготвени. Јас сум сигурен дека и сите други се подготвени – без Тошко, Балабанов и Ива, во краен случај. Но другите се склони“ рече Стојанов во интервју за весникот „24 Часа“.
Тој прогнозира дека при гласањето недоверба на владата на Петков „ќе има разум кај тие пратеници“.
Инаку, пред бугарскиот парламент и во парламентот, вчера имаше протест а потоа дојде и до остри расправии и физички судир меѓу пратеници, известува mediapool.bg.
Откако беше разрешен Минчев, илјадници граѓани се собраа вчера пред парламентот за да протестираат, останувајќи таму со часови. По 22 часот ситуацијата ескалираше откако полицијата спречи обид за напад врз пратениците од „В’зраждане“ (Преродба) на Костадин Костадинов, изразито националистички и проруски млад политичар. Него во еден момент демонстрантите го гаѓаа со илјадници стотинки, нарекувајќи го „Копејкин к…во!“.
Костадинов претходно од парламентарната говорница рече оти се сомнева во спонтаноста на протестот против разрешувањето на Минчев и „објаснуваше“ дека се прави нешто што нарекува на „Мајдан“ во Украина во 2014 година, кога народот во Кијив протестираше против прорускиот претседател на Украина, Виктор Јанукович.
По неговиот говор, реагираше Јавор Божанков од БСП, кој рече дека видел како Костадинов демонстрантите го гаѓаат со стотинки и копејки, и рече дека Костадинов се плаши бидејќи неговите гласачи го виделе како гласа заедно со ДПС за отстранување на Минчев. Костадинов со години наназад е жесток критичар на ДПС, обвинувајќи ја партијата за огромен криминал со државни пари и работење против Бугарија и Бугарите во интерес на Турција.
По размената на репликите меѓу Костадинов и Божанков, пратениците почнаа да галамат, а еден пратеник замалку ќе беше кутнат на земја додека се караше со Хамид Хамид од ДПС. Откако претседавачот на седницата не успеа да ги совлада страстите, прогласи пауза, пишува mediapool.bg
