Денес потпишав указ за доделување Орден „За заслуги“ од 1 степен, на Марина Вјазовска, украинска математичарка која оваа година стана лауреат на Филдс медал, рече украинскиот претседател, володимир Зеленски во најновото обраќање.
„Ова е многу важна и престижна награда – ја нарекуваат Нобеловата награда за математика.
Украинката г-ѓа Вјазовска стана втората жена во целата историја на наградата од 1936 година која го освоила овој медал. Таа успеа да го реши проблемот со пакување сфери во осумдимензионален простор. Како што забележуваат научниците, Марина Вјазовска понуди многу силни идеи и помогна во решавањето на поврзаните проблеми.
Денес сакам да ѝ се заблагодарам на г-ѓа Марина. Да ѝ се заблагодарам не само за нејзината работа, за многу моќниот математички резултат, туку и за фактот дека таа ни помага на сите нас, на сите Украинци, да ја заштитиме нашата слобода и независност. Вклучително, за време на церемонијата на доделување на Филдсовиот медал на Светскиот конгрес на математичари, во својот говор г-ѓа Марина зборуваше за Украина, за војната на Русија против нашата земја, за злосторствата на руските окупатори.
Г-ѓа Марина студирала во Украина, во Кијив, работи во Швајцарија, во Лозана, раководи со одделот за теорија на броеви. И верувам дека ќе дојде денот кога Марина Вјазовска ќе може да се врати во Украина и да предава овде.
Учествував во работата на конференцијата „Азиско лидерство“, која се одржува секоја година во Сеул, главниот град на Република Кореја. Ова е една од оние платформи кои го привлекуваат вниманието на целиот регион. И за Украина е важно нашите интереси и вредности да се слушнат и да се согледаат во сите делови на светот, особено во водечките земји од Азија. Им се заблагодарив за поддршката и повикав на поактивно противење на руските тактики за тероризам.
И каква зла иронија: денес претставниците на окупациските структури во Донецк објавија дека се, како што велат, признати од Северна Кореја. Секако дека ќе реагираме многу жестоко на сите нивоа. Но, ова е таква вест што не ни има потребаод дополнителни коментари. Сè е очигледно. По кој пат чекориме ние и до што можат да водат окупаторите?
Продолжува расчистувањето на урнатините по рускиот напад врз градот Часив Јар. Засега на списокот на загинати има 48 лица, меѓу кои и едно дете. За жал, бројот на спасените не е променет – 9 лица. Спасувачите ќе работат на лице место додека не се расчистат сите остатоци. Тоа беше еден од најбруталните руски удари во текот на целата војна – толку многу жртви… Моето сочувство до роднините и пријателите на жртвите.
Се подготвувам да им се обратам на учесниците на форумот во Хаг во Холандија, кој ќе се одржи утре и е посветен на изведување на руските воени злосторници пред лицето на правдата. Светските демократии се подготвени да направат се што е потребно за секој руски терорист да сноси одговорност за злото врз Украинците. И ние мора да ги координираме нашите напори на таков начин што сите виновници ќе добијат правични казни. Ќе има Трибунал.
Денес во вестите има многу референци за средбата во Турција за деблокирање на извозот на земјоделски производи од нашата земја преку Црното Море. Навистина правиме значителни напори да го вратиме снабдувањето со храна на светскиот пазар. И јас сум им благодарен на Обединетите нации и Турција за нивните соодветни напори. Успехот на оваа приказна не ѝ е потребен само на нашата држава, туку, без претерување, и на целиот свет. Ако е можно да се отстрани руската закана за поморството во Црното Море, тоа ќе ја отстрани сериозноста на глобалната криза со храна. Украинската делегација ме информираше дека има одреден напредок. Деталите ќе ги договориме со Генералниот секретар на ОН во наредните денови.
Вечерта, како и обично, го потпишав указот за доделување награди на нашите војници. На 136 учесници на борбените дејствија им беа доделени државни награди, од кои 25 постхумно.
Вечен спомен на сите оние кои ги дадоа своите животи за Украина!
Вечна благодарност на секој и на секоја што ја чуваат нашата земја!
Слава на Украина!“, рече Зеленски.
