Украинскиот премиер, Денис Шмихал, во разговор за Политико изјави дека Украина има план да влезе во Европската унија во следните две години.
„Имаме многу амбициозен план за влез во Европската унија во следните две години. Значи, очекуваме дека оваа година, во 2023 година, веќе можеме да ја имаме оваа претпристапна фаза на преговори“, рече тој.
Амбасадорот на ЕУ во Украина, Мати Маасикас вели дека Брисел разговара за напредокот на Украина во работењето на препораките на ЕУ поврзани со доделувањето на статусот кандидат за ЕУ.
На Самитот Украина-ЕУ кој ќе се одржи на 3 февруари во Кијив ќе се разговара за воената ситуација, мировниот план на претседателот Зеленски и поддршката за Украина од партнерите.
„Пред сè, има сигнал за солидарност со Украина. Се разбира, воената ситуација и мировниот план на претседателот Зеленски поддржан од ЕУ се меѓу прашањата за кои ќе се разговара. Гледаме доцнење во обезбедувањето помош на Украина во воена, економска , финансиски, хуманитарни и енергетски области итн.“, изјави за новинарите амбасадорот на ЕУ во Украина, Мати Маасикас, пренесува на Укринформ.
Маасикас, исто така, истакна дека брзината на секој процес на интеграција зависи првенствено од активностите на кандидатот, особено од тоа колку брзо ќе се усвои и имплементира законодавството на ЕУ. Проценката на напредокот во спроведувањето на Украина е во тек.
„Значи, опсегот на прашања е доста голем“, рече шефот на делегацијата на ЕУ во Украина.
За претстојниот самит на Украина-ЕУ во петок, украинскиот премиер Денис Шмихал вели дека се надева дека Украина може да постигне „значителен скок напред“, особено во одредени области – договор за безвизен режим за индустриски стоки; суспензија на царинските давачки за украинскиот извоз за уште една година; и „активен напредок“ за приклучување кон шемата за плаќања СЕПА (Единствена зона за плаќања во евра) и вклучување на Украина во областа за мобилни роаминг на ЕУ.
„Очекуваме напредок и забрзување на нашиот пат кон потпишување на овие договори“, рече Шмихал и додаде дека претседателот Зеленски сериозно ја сфаќа корупцијата во Украина, алудирајќи на неговото брзо реагирање во смената на службениците овој месец.
Корупцијата, вели Шмихал, не се роди вчера, но сигурен е дека ќе се искорени, затоа што тоа е клучно за пристапот на земјата во ЕУ.
Тој, исто така, рече дека владата е подготвена да го ревидира своето неодамнешно законодавство за Уставниот суд на земјата за да ги исполни барањата и на Европската комисија и на Венецијанската комисија, советодавно тело на Советот на Европа.
„Промените би можеле да дојдат уште оваа недела, пред самитот“, рече Шмихал.
Симболичната моќ на овонеделниот самит се очекува да испрати силен сигнал до Москва за европските аспирации на Украина, пишува Политико.
Како што објави Укринформ, министерот за надворешни работи Дмитро Кулеба претходно изјави дека Украина смета на опипливи практични исходи од Самитот Украина-ЕУ и позитивна оценка за спроведувањето на препораките на Европската комисија, што ќе и овозможи на земјата да ги започне претпристапните преговори уште 2023 година.
Подготви: А. Ристески
