Една од најтешко погодените области во катастрофалниот земјотрес е градот Кахраманмарас на југот на Туркије. Градот беше речиси целосно срамнет со земја. Деновиве на социјалните мрежи се шири фотографија на која се гледа како една зграда стои недопрена по земјотресот меѓу урнатините на останатите објекти.
Зградата на сликата е во Кахраманмарас, таа е зграда на претставништвото на Комората на градежни инженери. Кога науката и технологијата би се применувале барем за доброто на луѓето, пишуваат корисниците на Твитер.
One building standing in Kahramanmaras: The Chamber of Civil Engineers pic.twitter.com/tJAfA4whYb
— Ragıp Soylu (@ragipsoylu) February 10, 2023
Зошто новите згради во Турција се распаднаа како да се од хартија?
Становите за кои некогаш луѓето макотрпно штеделе, ги уредувале и ги правеле за удобно живеење, сега лежат во куп урнатини по силниот земјотрес што ја погоди Туркије. Нови и стари згради, некои изградени пред само шест месеци, се распаднаа. Други се сплескаа како бетонски палачинки.
Целосниот обем на штетите од земјотресот со интензитет од 7,8 степени според Рихтеровата скала во понеделникот и континуираните последователни потреси што предизвикаа хаос во Туркије и Сирија, при што загинаа повеќе од 24.000 луѓе, не е познат. Бројот на смртни случаи во Турција секојдневно се зголемува.
Паралелно, расте гневот зошто, во земја со историја на големи земјотреси, квалитетот на градбата е толку лош што зградите се распаѓаат како да се од хартија.
Експертите велат дека Турција има прописи за спречување таква катастрофа, но тие слабо се спроведуваат од градежните компании, од кои најголемите често се блиски до претседателот Реџеп Тајип Ердоган. Официјални лица велат дека 12.141 зграда се или уништени или сериозно оштетени во Туркије.
Имајќи предвид дека првиот земјотрес беше толку силен, „требало да се очекуваат штети, но не и ваква штета каква што гледате сега“, изјави за француската новинска агенција АФП Мустафа Ердик, професор на Универзитетот Богазичи во Истанбул.
Дури и ако зградата се урне, луѓето обично можат да се скријат додека спасувачите не ги најдат, рече тој. Но, овој пат, додаде Ердик, зградите „се урнаа како палачинки“. „Подовите се наредени еден врз друг“, нагласи професорот, што значи дека има мали шанси луѓето да бидат пронајдени живи.
