Претседателот на албанската опозициска Демократска партија Сали Бериша на денешниот протест во Тирана побара оставка од премиерот Еди Рама.
Пред зградата на Владата се одржува протест на здружената опозиција на кој присуствуваат илјадници граѓани, јавуваат албанските медиуми.
Над 1.000 полицајци се ангажирани за обезбедување на протестот, а вратата на влезот од Владата била блиндирана со дополнителен метален дел, пишува Албанијан пост.
Бериша во својот говор ја опиша аферата на Рама, во врска со агентот на ФБИ, како најсериозен скандал што го „извалкал имиџот на земјата во светот“.
Нарко-премиер без религија, без држава, без знаме го корумпира шефот на контраразузнавачката служба на сојузничката држава САД, истакна Бериша и порача дека Рама треба да поднесе оставка по „овој чин на нелојалност кон големиот сојузник на албанскиот народ“.
Претседателот на Партијата на слободата и поранешен претседател на Албанија, Илир Мета оцени дека Еди Рама за 10 години „ја искористил својата моќ за да ја приграби државата и за своите мафијашки интереси“.
Поранешниот претседател на Република Албанија истакна дека „корупциската афера Мекгонигал-Рама го шокираше целиот свет од двете страни на Атлантикот“.
Поранешниот агент на Федералното истражно биро (ФБИ) Чарлс Мекгонигал беше обвинет за сомнителни зделки со руски олигарси, но во обвинението се наведува дека тој имал сомнителни бизнис врски со политичари од Албанија и Босна и Херцеговина.
Тој, меѓу другото, е обвинет дека не му ја открил на ФБИ неговата врска со поранешен офицер на албанската разузнавачка агенција, опишан во обвинението како „лице А“ од август 2017 година.
Исто така, според обвинението, тој не откри дека „имал контакти“ со албанскиот премиер Еди Рама, кој изјави дека наводите против Мекгонигал немаат никаква врска со него.
