„Европската перспектива е достижна, а она што го очекуваме од ЕУ е извесност и јасен план за проширувањето, што ќе биде поттик за забрзување на процесите и трансформација на општеството. Покажавме дека сме кредибилен партнер и подготвени да одговориме на задачите, на ред е ЕУ да даде временска рамка која е достижна и ќе ни даде доволно време да ги завршиме задачите“ рече вицепремиерот за европски прашања, Бојан Маричиќ на прес-конференција со српската министерка за евроинтеграции Тања Мишчевиќ.
Тој додаде дека во моментов постои политички моментум и поддршка од Брисел за нова динамика на преговорите, пред се поради руската агресија врз Украина.
„Отворен Балкан ни покажа како е да се функционира по европски правила во некои области, како е да зборуваме за трговска размена, инфраструктурни проекти, мобилност и јакнење на економијата. Тоа е тоа за што мораме да разговараме во преговорите со ЕУ, да работиме за конкретни економски придобивки кои би ги имале и ќе ги имаат нашите граѓани“ рече Маричиќ.
Вицепремиерот истакна дека Северна Македонија останува посветена на исполнување на задачите и обврски за да се обезбеди европска иднина на сегашните и идните генерации.
