Бомбаш самоубиец уби девет војници кога со својот мотоцикл удрил во воено возило во северозападен Пакистан, што е најкрвавиот напад врз армијата оваа година, соопштија денеска официјални лица, јави ДПА.
Петмина други војници беа ранети во нападот во текот на ноќта во околината на Бану, мал град во непосредна близина на регионот Вазиристан во близина на границата со Авганистан. Областа некогаш била контролирана од исламистички борци поврзани со милитантната група Ал Каеда.
Во соопштението на војската се наведува дека војниците ја опколиле областа по бомбардирањето и дека трагаат по сторителите.
Ниту една група не ја презеде одговорноста за последните напади, но и пакистанските талибанци и милитантната група Исламска држава ги нападнаа безбедносните сили и цивилите во регионот.
Пакистанските талибанци, кои се одвоени од своите авганистански колеги, иако и двете групи го следат истиот тврд облик на сунитскиот ислам, убија десетици илјади луѓе во слични напади во последните децении.
Од 2014 година, тие беа истиснати од областите долж авганистанската граница во серија офанзиви, но по падот на Кабул во рацете на авганистанските талибанци во 2021 година, тие се обидуваат да ја вратат контролата.
