Доколку се обрне внимание на содржините кои дел од македонските медиуми ги објавуваат на своите канали за информирање, може да се добие впечаток дека Северна Македонија, во најмала рака е членка на Руската федерација, а не на НАТО и претендент за идна членка на ЕУ.
Секое појавување на Путин во јавноста, вклучително и неговите изјави, кои скоро секогаш се на штета на евроатлантските интеграции, се пренесува некритички, во дел од нив и со нескриено воодушевување, без да се изрази било каков сомнеж во нивната вистинитост, а за проверка и спротивставување на ставовите воопшто не доаѓа предвид.
И како по правило, речиси секогаш истите медиуми, веќе евидентирани како дистрибутери на руска пропаганда и дезинформации на македонскиот информативен простор, оркестрирано ги споделуваат големите мисли на великиот водач, како и неговите (ретки) патувања во странство ( во блискиот сојузник Казахстан) како огромно достигнување и победа на руската дипломатија.
Секако, не се заборава да се потенцира путиновото сфаќање за војната на Блискиот исток, а особено се дава до значење неговата изјава, во која како врховен судија носи пресуда, дека единствен виновник за војната помеѓу Израел и Хамас е САД, или, како што дел од нив здружено ја пренесоа веста зедно со печатната грешка, како што им била испратена од нарачателот, во името на еврејската држава, која ја пишуваат како: Ирзаел.
Драган Мишев / Цивил Медиа