Советот на ЕУ денеска одлучи да додаде уште по еден поединец на своите листи за санкции на лица поврзани со терористичките активности на Хамас и на Исламската држава и Ал Каеда.
На листата на санкционирани како одговор на заканата од Хамас и неговите брутални и неселективни терористички напади врз Израел на 7 октомври 2023 година, денеска е додаден политичкиот лидер на ова движење Јахија Синуар.
На листата, пак, на санкционирани поради поврзаност со организацијата Исламска држава или терористичката мрежа Ал Каеда е додаден Ахмед Калед Милер, член на сомалиското движење Ал Шабаб. Милер е предмет на санкции поради неговото учество во борбени операции и терористички активности во име на Ал Шабаб, движење поврзано со Ал Каеда, кое дејствува во регионот на Рогот на Африка и е одговорно за бројни терористички напад во Кенија, Сомалија и околните земји.
Со одлуката, од оваа листа е избришано и едно починато лице, со што на неа остануваат вкупно 15 поединци и пет групи.
Согласно двете одлуки, на санкционираните им се забранува влез на територијата на ЕУ и им се замрзнува сиот имот и финансиски средства во земјите членки, додека на субјекти со седиште во Унијата им се забранува да ми ставаат на располагање средства и други економски ресурси.
Терористичката листа на ЕУ за режим на санкции поврзани со Хамас е различна од онаа која се однесува на лица и ентитетите кои имаат врски или ги поддржуваат Исламската држава и Ал Каеда.
Со денешните одлука ЕУ ја потврдува решеноста да се спротивставува на континуираната терористичка закана што ја претставуваат Хамас, Ал Каеда, Исламската држава и нивните регионални филијали.
– ЕУ останува посветена на преземање решителна акција против оние кои продолжуваат да го загрозуваат меѓународниот мир и безбедност преку планирање, финансирање и извршување терористички напади и со ширење на нивната смртоносна терористичка пропаганда низ светот, се додава во соопштението на Европскиот совет.
