Раководителите на неколку светски медиумски куќи потпишаа писмо во кое ги повикуваат израелските власти да ги заштитат новинарите во Газа, велејќи дека новинарите работат во услови без преседан и дека се соочуваат со „голем личен ризик“ за време на нападот на Израел врз енклавата.
Меѓу медиумските куќи, чии главни уредници го потпишаа писмото во четвртокот, се наоѓаат Асошиетед прес, АФП, Ројтерс, Њујорк Тајмс, Вашингтон Пост, Би-Би-Си, Си-Ен-Ен, Гардијан, Фајненшл Тајмс, Дер Шпигел и Хаарец. Во војната меѓу Израел и Газа се убиени најмалку 94 новинари; повеќето од нив – 89, се Палестинци убиени од израелската армија, според Комитетот за заштита на новинарите (CPJ), кој објави писмо потпишано од раководителите на 59 новински организации.
CPJ соопшти дека војната е „најопасната досега“ за новинарите. Израел негира дека намерно гаѓал новинари и цивили, велејќи дека само ја напаѓа палестинската исламистичка група Хамас, која управува со Газа и го нападна Израел на 7 октомври.
„Овие новинари продолжуваат да известуваат и покрај сериозниот личен ризик. Тие продолжуваат и покрај загубата на семејствата, пријателите и колегите, уништувањето на домови и канцеларии, постојаното раселување, прекините на комуникациите и недостигот на храна и гориво“, се наведува во писмото.
„Новинарите се цивили и израелските власти мора да ги заштитат како неборци според меѓународното право“, се додава во писмото.
Хамас го нападна Израел на 7 октомври, убивајќи 1.200 луѓе, според израелските податоци. Израел оттогаш воено ја нападна Газа, управувана од Хамас, убивајќи повеќе од 30.000 Палестинци, од кои многумина се цивили, во бомбардирањето на малата енклава, според локалното Министерство за здравство.
Поголемиот дел од Газа е срамнет со земја во израелската офанзива, а речиси сите нејзини 2,3 милиони жители се раселени и се на работ на глад. Јужноафриканската Република го обвини Израел за геноцид пред Светскиот суд. Израел ги негира обвинувањата и вели дека дејствува во самоодбрана по нападот на 7 октомври.
Г. Т.
