Реториката на дел од партиите уште од предизборието, во која етничките Македонци се поттикнуваа да размислуваат дека Албанците имаат премногу власт и дека Македонците се народ од втор ред, како и пораките со слоганите „Македонија повторно твоја”, потоа и системското напаѓање на концептот на правична и соодветна застапеност, што е Уставна норма, која е резултат на Охридскиот рамковен мировен договор, придонесе да се создаде перцепција кај Албанците и немнозинските заедници дека национализмот на ДПМНЕ и ЗНАМ ќе се обиде да чепне во веќе остварените права на голем процент од населението, вели во изјава за „Фронтлајн“, Џелал Хоџиќ – претседател на СДА Македонија, зборувајќи за тоа дали и зошто партиите не/треба да полемизираат на тема дестабилизација.
– Одговорите на сето ова, кои секако беа за очекување, од албанскиот политички фактор, кој има и моќ и механизам да се спротистави на оваа перцепција, дополнително ја зовријаа атмосферата, затоа што политичкиот одговор во јавноста од ДУИ и ВЛЕН исто така содржеше одредени националистички пораки од кои кај етничките Македонци служеа за подигнување на спиралата на национализмот и потврда на создаваната перцепција дека Албанците сакаат доминација. После изборите ВЛЕН се повлече од ветените позиции и влезе во власта со ДПМНЕ и ЗНАМ, вели претседателот на СДА Македонија.
Ако го додадете, вели тој, препукувањето со национализам помеѓу партнерите во власта ЗНАМ и ВЛЕН кое трае со месеци, најавите за чепкање во правичната и соодветна застапеност како и албанскиот јазик е директен извор на контаминирање на општеството со национализам и подгревање на етничките тензии.
– Уште еден фактор сериозно влијае на поттикнување на тензиите, а тоа е внатрешната блокада на европските интеграции на државата. Одземањето на европската перспектива на државата автоматски го зголемува етничкиот јаз помеѓу Македонците од една страна и Албанците и немнозинските заедници од друга страна. Овие случувања ја забрзуваат потребата на опозицијата што побрзо да почне да соработува помеѓу себе и да понуди концепт кој е природен за државата, а тоа е држава рамноправна за сите нејзини граѓани, без разлика на нивната етничка и верска определба, а и да понуди на власта и јавноста што побрзо откочување на европските интеграции, кои ќе помогнат да направиме модерна и демократски развиена држава, нагласи нашиот соговорник.
Во спротивно, подвлече Хоџиќ – опозицијата ќе влезе во стапица која сме ја гледале претходно, а најдобар пример за тоа е 2012 и 2013-та година кога збунетата опозиција, предводена од Бранко Црвенковски кој тогаш нѐ повикуваше на протести на улица против режимот на Груевски, а потоа со диктаторот Груевски правеше коалиција за локалните избори во Кичево и Струга против дел од своите граѓани.
– ВМРО -ДПМНЕ и тогаш и сега посакува етничко партнерство со опозицијата, зошто таа тогаш ја губи својата смисла на постење и игра на терен непознат за неа, а ДПМНЕ во услови на подигната етничка атмосфера без проблем ја дели власта со партнерот кај Албанците кој исто така го оградува и зацврстува своето гласачко тело. Секако, цената ја плаќаат граѓаните и државата. Дозволете на крај јавно да го осудам палењето од страна на неколкумина на државното и сите други знамиња како еден нецивилизациски чин. И да упатам порака дека секој обид на укинувањето на веќе остварените права, власта државата свесно ја внесува во дестабилизација, истакна Хоџиќ.
Дестан Јонузи
