Владите во еврозоната мора да размислат за издавање заедничка „коронаобврзница“, за да не предизвика пандемијата на корона вирусот нова должничка криза, изјави денеска членот на Упрваниот одбор на Европската централна банка (ЕЦБ), Карлос Коста.
– Потребен е заеднички и сеопфатен одговор од Европа за да се надополни програмата за купување на обврзници на ЕЦБ и флексибилност во однос на фискалната дисциплина и државната помош што ја нуди Европската комисија, нагласува тој.
– Ако не соработуваме во оваа криза, трајно ќе му наштетиме на европскиот проект, напиша Коста, кој исто така е гувернер на Португалската централна банка.
– Мора да се најде решение за да се спречи кризата со корона вирусот да стане нова должничка криза, додаде тој.
Притоа, Коста им се придружува на поголем број официјални претставници на ЕЦБ, кои ги повикуваат владите во еврозоната да одговорат на координиран начин на пандемијата.
Во петокот, ЕК ја отвори вратата за олеснување на буџетските правила за земјите-членки и издавање на заеднички обврзници во еврозоната за да ги ублажат ефектите од епидемијата.
