Претседателот на Владата, Христијан Мицкоски, денеска истакна дека државата политиката треба да ја базира врз позициите на САД како стратешки партнер, особено во мигови кога во рамки на ЕУ постојат несогласувања и по прашања како што е буџетот на Унијата.
Мицкоски денеска на прашање на новинарите за позицијата на Владата по однос случувањата во светски рамки, истакна дека стратешка цел на државата е полноправно членство во ЕУ, но истовремено потсети и дека САД се наш стратешки партнер.
– Ние како држава треба да се позиционираме заедно со нашиот стратешки партнер, убедени сме како Влада дека тоа е правецот каде како држава треба да се движиме, рече тој.
Во таа насока била и поддршката од македонската Влада на Резолуцијата поднесена од страна на САД пред Советот за безбедност во ОН, а која се однесуваше на тригодишнината од почетокот на руската агресија врз Украина.
– Дека нашиот став беше исправен потврдата стигна при гласањето во Советот за безбедност на ОН, чија одлука е конечна. Таму голем дел од постојаните членки и оние кои не се постојани членки на Советот, а се држави на ЕУ, не гласаа против туку гласаа воздржано. Тие не ја блокираа, со што Резолуцијата на која бевме коспонзори, поднесена од САД, стана обврзувачка. Тоа е правецот што оваа Влада треба да го следи, рече Мицкоски, кој истакна дека траен, одржлив мир во Украина е и потребен и на Европа и на светот.
Притоа уште истакна дека неговите очекувања се во периодот што следи да биде потврдено она што го има кажано и претходно во други прилики, дека најголемиот дел од европските лидери ќе бараат средба со американскиот претседател Доналд Трамп и ќе бараат начин како да се стави крај на конфликтот предизвикан од руската агресија врз Украина.
Што се однесува на напорите за деблокирање на процесот на присоединување на земјата кон ЕУ, односно дали очекува САД да влијаат за надминување на спорот со Бугарија, премиерот Мицкоски нагласи дека секоја прилика ја користи за да ги презентира македонските аргументи и да побара поддршка за деблокирање на европскиот пат на земјата.
