„Очајни се обидите на ВМРО-ДПМНЕ да прикаже некаков раст на платите, кога во реалноста граѓаните осиромашуваат, а секое второ семејство се бори да ги покрие основните трошоци. ВМРО-ДПМНЕ и оваа Влада, како ниедна досега, ги запоставија работниците, нивните права и покачувањето на платите. Сега се обидуваат да претстават минимален раст кај дел од вработените во јавниот сектор како сопствен успех, иако тоа им следуваше и без нивна заслуга“, соопштуваат од опозициската СДСМ.
Од СДСМ додаваат дека „откако свесно дозволија цените да одат нагоре, без да усвојат ниту една мерка за зголемување на платите, сега се обидуваат да убедат дека граѓаните живеат добро и дека платите растат“.
– Но граѓаните знаат подобро – ДПМНЕ се грижи само за сопствените партиски интереси. Тоа се гледа низ секоја нивна политика и постапка. Ниту ги заштитија граѓаните од алчните трговци, ниту ја спречија инфлацијата, ниту понудија вистинска финансиска поддршка во кризата. Не се справија ниту со проблемите со парното и струјата, чии цени отидоа до небо. Предоцна е Владата да се вади со лажен ПР. Граѓаните веќе ги почувствуваа нивните „економски политики“ – и тоа на своја кожа, велат од СДСМ.
Темата за зголемување на минималната плата повторно се актуелизираше откако синдикалните претставници беа повикани на состанок во Владата со премиерот Христијан Мицкоски.
Владата останува на ставот дека ќе го прифати секој договор помеѓу синдикатите и работодавачите што ќе биде постигнат во рамки на економско-социјалниот дијалог, а останаа и спротивставените барања и ставови на Сојузот на синдикатите на Македонија (ССМ) и на Конфедерацијата на слободни синдикати (КСС).
Повторен е и ставот дека нема можности за субвенционирање на платата која ССМ бара да биде 30.000 денари, а за која КСС смета дека ќе опфати мал дел од вработените. Најавено е дека за една недела ќе се утврди репрезентативноста на синдикатот и ќе почне со работа Економско-социјалниот совет, како и дека ќе има ревидирање на одредни членови во Општиот колективен договор за јавниот сектор.
По последното усогласување на минималната плата со нето износ од 1800 денари согласно законските одредби, што стапи во сила од почетокот на месецов, и реакцијата на ССМ за едностраност во одлучувањето од страна на Владата без консултација со синдикатите, претседателот на ССМ Слободан Трендафилов по вчерашниот состанок оцени дека има волја за наоѓање решение за прашањата за стандардот на работниците.
Дестан Јонузи
