Европската унија може значително да ја зголеми воената помош за Украина доколку американскиот претседател, Доналд Трамп, не успее да го убеди рускиот лидер, Владимир Путин, да склучи мир, изјави комесарот на ЕУ за одбрана и вселена, Ендрус Кубилиус, за Х.
„Доколку Трамп не успее да го убеди Путин да склучи мир, можеме многу брзо да презентираме поубедлив аргумент за мир – со значително зголемување на нашата воена поддршка за Украина“, истакна тој, пренесен од Укринформ.
Кубилиус додаде дека досега Европската Унија и САД издвоиле околу 40 милијарди евра годишно за воена помош за Украина.
„Но, можеме да потрошиме иста сума за купување модерно оружје во самата Украина, кое ќе чини околу половина од она што се произведува во ЕУ или САД. Ова практично ќе го дуплира обемот на оружје што Украина го добива за истите 40 милијарди евра. Вистинската вредност на нашата поддршка ќе се зголеми на 80 милијарди евра“, нагласи тој.
Еврокомесарот, исто така, објасни каде ЕУ ќе најде средства за зајакнување на воената поддршка за Украина.
„Новите SAFE кредити, поддржани од ЕУ, им ја даваат токму оваа можност на земјите-членки – да ги користат кредитите за зголемување на воената поддршка за Украина. Еве како формулата „Мир преку сила“ навистина може да функционира во пракса. SAFE кредитите значат сила за Украина!“, забележа Кубилиус.
