Пишува: ЗОРАН ИВАНОВ
Деновиве, по хормонално антикоруптивните активности на се попопуларната скопска градоначалничка, се испокршија новинари, уредници, аналитичари, по инерција и по примерот на пропагандата на ДПМНЕ, за свртување на јавното внимание од центарот, од главната криминална поента кон маргините.
Кон релативизирање на суштината како, на пример, со онаа на релација “кочанска трагедија – модуларна трагедија”.
Па, некако идентично и со ова најновиве аферски бранувања со Данела, Скопје, Чаир, Висар, Меџити.
Новинари, уредници, медиуми, се ставија во улога на железничарски скретничари па темата дивоградби и криминалот со нив, ја прешалтуваат со прашања од типот каде беше Данела досега, што прави со сметот скопски расфрлан, со автобусите бесплатни и нередовни, со водата што се почесто секнува, со … И со слични, секако, прашања легитимни, граѓански.
Но, во случајов со темава “чаирски дивоградби”, практично излегува финти новинарски.
Штосеви медиумски за да се заврти јавното внимание од центарот на јавниот интерес.
Да се маргинализира и да се релативизира главната тема.
Да се разводни криминалот од чаирските дивоградби.
Да се добие во време за да се задскрие функционерската бизнис корупција.
И што новинарски е и најдилетантното, да се амнестираат надлежни институции за евентуални катастарски фалсификати за што обвинува градоначалничката на Скопје, а за што полицијата уште гледа во бело и за што обвинителството уште се прави на триипол.
Па, уредници порталски и уредници останати, да не должам и, еве, кажано и по скопски “да не го тупам”, свесно и наменски или несвесно и по некоја инерција, сеедно, темата за ова активностиве чаирски на Данела, за зградите дивоградби, за криминалите на мафијата политичко урбана, наместо да се насочуваат на сметот, на превозот, на водата, наместо да се релативизираат и замаглуваат профитите од дивоградбите, да се проба и антикорупциски и медиумски и авторски и граѓански, темата за криминалите со зградите диви, да се врати на магистралата.
На поентата дивоградби и на рефлексијата од нив – корупција, пари, пари, …
Секако витални се и скопскиот ЈСП, и скопскиот Водовод, и скопскиот Комуналец.
Но, во мигов, поентата журналистичка, доколку наводите на Данела се покажат за точни, е во масовната урбано политичка корупција од несфатливи цивилизациски размери.
Затоа, овде само “редакциско” потсетување дека поентата на новинарските напливи деновиве е во дивоградбите, а не во сметот, водата и превозот.
Но вие си знаете и за мотивите и за незнаењето новинарско и уредничко со кое се прави медиумски смут. Со кое се замаглуваат политичко урбаните криминали, во случајов, во скопската Чаир.
Текстот е личен став на Авторот. Преземено од Нова
