На самиот почеток на новата учебна година повторно се отвора старото прашање – дали учениците во Македонија ќе имаат учебници. Опозициската СДСМ со остра реакција обвини дека во училиштата владее целосен хаос, дека учебници нема за голем број предмети и дека новиот електронски дневник не функционира.
„Образованието и учениците денес ја плаќаат цената на неспособноста на министерката Весна Јаневска. Недостасуваат учебници по математика и историја за осмо одделение, по хемија и физика, како и по странски јазици. Во средните училишта состојбата е уште полоша – за стручните предмети учебници речиси и да нема“, стои во соопштението на СДСМ.
Од таму посочуваат дека дел од родителите се приморани сами да ги печатат учебниците кои се споделуваат преку Вибер групи, а наставниците се соочуваат со дигитален колапс бидејќи новиот е-дневник постојано блокира и не снима податоци. „Наместо унапредување, добивме деградација на образованието“, велат од СДСМ и бараат Јаневска да си поднесе оставка.
Јаневска: „90 отсто учебници веќе доставени“
Министерката за образование и наука Весна Јаневска, пак, тврди дека оваа година темата „има или нема учебници“ е затворена. Според неа, најголемиот дел од учебниците, околу 90 проценти, се веќе стигнати во училиштата, а преостанатите ќе бидат доставени во првата недела од учебната година.
„Оваа година, за разлика од претходните седум кога имаше сериозни проблеми, ќе има учебници по сите предмети од прво до деветто одделение, како и за прва до четврта година во средните училишта. Имаме нови печатени наслови, но и електронски учебници поставени на веб-страниците. Од следната година ова повеќе нема да биде тема“, рече Јаневска при посетата во Кавадарци заедно со премиерот Христијан Мицкоски.
Таа додава дека учебници ќе има и по странски јазици, што, според неа, претходните влади не успеале да го обезбедат.
Хаосот се повторува секоја година
Иако МОН уверува дека учебници има доволно, од терен стигнуваат бројни поплаки од наставници и родители дека учебниците се нецелосни, стари и во лоша состојба. Слични критики се повторуваат речиси секоја учебна година, без разлика која партија е на власт.
Дополнителен проблем годинава е и новиот е-дневник, кој според наставниците не е функционален и ги отежнува првите денови на наставата. Образовните експерти предупредуваат дека ваквиот хаотичен почеток ја намалува довербата на учениците и родителите во целиот систем, и дека реформите мора да се спроведуваат со поголема подготовка и координација.
Дестан Јонузи
