Украинскиот претседател Володимир Зеленски тврди дека Русија планира да започне голема агресија на европскиот континент во 2029 или 2030 година, наведувајќи го зголеменото производство на руско оружје како доказ.
Зеленски објави на Телеграм дека зголеменото производство на оружје, исто така, покажува дека Русија не е подготвена да ја заврши војната против Украина.
„Со оглед на ситуацијата на бојното поле, не гледаме дека Русија сака да престане. Проблемот е што кога ја гледаме руската воена индустрија, гледаме дека тие го зголемуваат своето производство. И, според нашата проценка, тие сакаат да ја продолжат оваа војна“, рече Зеленски, објавија украинските медиуми.
Тој повтори дека заедничкиот притисок од светските сили би можел да ја принуди Русија да направи пауза во војната.
Зеленски ги повика земјите-партнери да размислат како да ги сопрат Русите во Украина сега.
Министерството за финансии на САД објави вчера дека вовело санкции врз две големи руски нафтени компании, Роснефт и Лукоил, и ја повика Москва веднаш да се согласи на прекин на огнот во Украина.
Зеленски тврди дека загубите на Русија само од овие санкции ќе изнесуваат најмалку 50 милијарди долари годишно.
Високата претставничка на ЕУ за надворешни работи и безбедносна политика, Каја Калас, на 23 октомври објави дека Европската Унија го одобрила 19-тиот пакет санкции против Русија.
