Собранието на Република Северна Македонија соопшти дека постапка поврзана со евентуално одземање на пратенички имунитет може да се иницира исклучиво врз основа на официјално барање поднесено од надлежен државен орган.
Соопштението следува по новинарски прашања упатени до Собранието, во врска со тоа дали ќе се преземат мерки кон пратеникот Сашко Јанчев во однос на неговиот пратенички имунитет.
„Согласно Уставот и Деловникот на Собранието, постапка поврзана со евентуално одземање на имунитет на пратеник може да биде иницирана исклучиво врз основа на официјално барање поднесено од надлежен државен орган“, се наведува во соопштението.
Од Собранието појаснуваат дека ваква постапка е можна само во случаи кога се бара поведување кривична постапка, определување мерка притвор или извршување казна затвор кон пратеник.
„Собранието не поведува вакви постапки по сопствена иницијатива, ниту пак може да ги иницира врз основа на барања од поединци, организации или медиуми“, се вели во соопштението.
Во оваа насока, како што информираат од Кабинетот на претседателот на Собранието, Африм Гаши, доставеното барање било проследено до Комисијата за деловнички и мандатно-имунитетни прашања, како и до пратеникот Сашко Јанчев.
„Претседателот на Собранието, Африм Гаши, го проследи доставеното барање до Комисијата за деловнички и мандатно-имунитетни прашања и до пратеникот Сашко Јанчев, во согласност со начелата на транспарентност и целосно информирање“, се наведува во соопштението.
Од Собранието додаваат дека доколку од надлежните органи биде доставено официјално барање за постапување, ќе се постапи согласно уставните и деловничките обврски.
„Доколку од надлежните органи биде доставено официјално барање за постапување, Собранието ќе постапи во рамките на утврдените уставни и деловнички обврски“, се наведува во соопштението.
Соопштението е потпишано од Кабинетот на претседателот на Собранието.
Ова следи по сообраќајната несреќа во септември годинава во скопско Марино, каде пратеникот на Левица Сашко Јанчев учествуваше во судир со мопед, при што еден малолетник почина, а друг е тешко повреден.
Родителите бараат одземање на пратеничкиот имунитет на Јанчев.
Редакција Фронтлајн
