Претседателот на Србија, Александар Вучиќ, синоќа пристигна во шаторската населба познато како „Ќациленд“, поставено на платото пред Домот на Народното собрание во Белград, каде што им се обрати на поддржувачите на Српската напредна странка. Како што изјави, дошол да им се заблагодари што го послушале неговиот повик и по девет месеци се согласиле шаторите да бидат отстрането, објави Nova.rs.
Вучиќ им се заблагодари на присутните за, како што рече, „величествениот пречек“, како и на младите луѓе кои, според него, ја покренале и одбраниле „најблагородната идеја“ – идејата за суверена и независна Србија „во која нормалните и пристојни луѓе не сакаат никого да мачат, убиваат или да го тргаат од политичката сцена, туку само да живеат нормален живот“.
„Колку повеќе исполнувавме барања, толку стануваа поарогантни“
Осврнувајќи се на студентските протести и блокадите на факултетите од пред една година, Вучиќ изјави дека првично верувал оти незадоволството било предизвикано од падот на настрешницата во Нови Сад. Тој тврдеше дека власта се трудела да ги исполни сите нивни барања и дека ги слушале „како од бог да доаѓаат“, иако, според него, дел од барањата биле нелогични.
„Колку повеќе барања исполнувавме, толку тие стануваа поaрогантни, објаснувајќи дека нема потреба ние нешто да зборуваме, дека сме ненадлежни и дека тие ќе ги уредуваат работите, за сметка на други земји, за да ја срушат Србија“, рече Вучиќ, додавајќи дека во тој момент Србија била економски и политички силна и водела суверена политика, вклучително и ставови за војната во Украина и Косово.
Тој додаде дека било тешко да се одговори на сите, како што ги нарече, невистини, посочувајќи дека од насилствата за кои се зборувало, единствено бил избоден човек во Пионерскиот парк, а „единствениот што примил куршум бил човек одовде“.
„Ви пречеше искрата на слободата“
Говорејќи за критиките зошто шаторската населба не била отстрането порано, Вучиќ изјави дека се наслушал „милион бесмислени коментари“, меѓу кои и дека наводно се попречувал сообраќајот.
„Ви пречеше сообраќајот? А не ви пречеше 25 дена кога ги држевте затворени Немањина и Кнез Милош – две најважни сообраќајници во Белград“, рече Вучиќ, обвинувајќи дека критиките биле насочени не кон логистиката, туку кон самото постоење на собирот. „Ви пречеше искрата на слободата што се роди во Пионерскиот парк – искрата на одбраната на државата и Србија“, додаде тој.
Најавени избори следната година
Коментирајќи ја акцијата на студентите во блокада за собирање потписи за распишување вонредни избори, Вучиќ изјави дека тие се вратиле на политичкиот терен, но дека на избори „лажење нема“.
„Среќен сум поради тоа. Се вратија на вистинскиот политички терен. Можат да ја обмануваат јавноста, да лажат за бројките, тоа не е проблем. На избори има и друга страна што брои“, рече Вучиќ.
Тој нагласи дека го прифатил, како што рече, „главното барање на блокадерите“ и најави дека следната година ќе се одржат избори, изразувајќи уверување дека неговата партија ќе победи.
На крајот, Вучиќ најави дека шаторската населелба ќе биде целосно отстрането и дека до 3 или 4 јануари на таа локација ќе бидат поставени новогодишни и божиќни куќички, додавајќи дека постои можност за еден месец да бидат отстранети и шаторите од Пионерскиот парк.
Студентите во Србија со акција „Распиши победа“: Масовна поддршка за вонредни парламентарни избори
Под слоганот „Распиши победа“, студентите во блокада вчера организираа акција за собирање потписи низ цела Србија, со цел да проверат колкава е поддршката на граѓаните за нивната борба и за барањето за распишување вонредни парламентарни избори. Акцијата се одржа во повеќе од сто општини и градови, на речиси 500 штандови, а според соговорниците на телевизијата Н1, претставува пресвртница во досегашните студентски активности.
Наместо свирчиња и транспаренти, овојпат граѓаните на повик на студентите земаа пенкала во раце и со свој потпис дадоа поддршка за политички промени.
„Да ги тргнеме, доста беше“, изјави еден граѓанин од Белград. Пензионерка објасни дека ја мотивирала тешката социјална состојба. „Имам пензија од 8.300 динари и 80 пари. Немам ни за два лека“, рече таа. Друга граѓанка истакна дека сака „да бидеме нормално општество, да живееме и да се радуваме, а не вака“.
Очекувањата беа високи и надвор од Белград. „Очекувам масовен одѕив и ова зло да го пратиме во минатото“, изјави граѓанин од Ниш, додека една нишлијка порача дека сака Србија да тргне кон Европа и претседателот Александар Вучиќ да замине од власт.
Студентите појаснуваат дека потписите немаат формална правна тежина, туку служат како вид на јавно пребројување и средство за поврзување со граѓаните. „Целта е да се вмрежиме со граѓаните и да знаеме на кого можеме да се потпреме“, изјави студентката Ана-Марија. Нејзин колега додаде дека акцијата претставува „вид пребројување“ кое треба да покаже дека барањето за избори не е само студентско.
Студентката Кристина Вељовиќ истакна дека преку потписите сакаат да покажат дека станува збор за поширока општествена волја. „Ова треба да покаже дека најголемиот број граѓани навистина ги сака тие избори и се подготвени да дадат придонес“, рече таа, додавајќи дека со оставање контакт, граѓаните даваат согласност да бидат директно информирани за идните активности.
Ректорот на Универзитетот во Белград, Владан Ѓокиќ, оцени дека акцијата успеала да анимира голем дел од јавноста и дека токму сега е моментот да се покаже кој е подготвен да даде понатамошна поддршка.
Поддршка на студентите дадоа и претставници од правосудството, уметноста и академската заедница. Обвинителката Бојана Савовиќ ја оцени акцијата како „симболичен чекор кон владеење на правото“, додека актерот Милан Цаци Михаиловиќ истакна дека ваквиот пристап овозможува проверка на реалната поддршка во гласачкото тело.
Актерот и режисер Тихомир Станиќ нагласи дека оваа форма на протест е поинаква од досегашните, бидејќи овозможува учество и на оние кои претходно не излегувале на протести поради страв од насилство. Професорот на ЕТФ, Пеѓа Михаиловиќ, оцени дека иако нема масовни собири на едно место, акцијата создава широка мрежа на граѓани низ целата земја кои бараат правда и избори.
Граѓаните низ Србија, од Шумадија до западните региони, изразија поддршка, но и свесни се дека патот нема да биде лесен. „Поддржувам младост. Ќе биде тешко, но мора да се издржи“, порача граѓанка од Крагуевац. Слични пораки дојдоа и од Краљево и Ваљево, каде што граѓаните нагласија дека не би потпишале доколку не веруваат во успехот.
Во Земун, симболично, двајца граѓани си помагаа еден на друг за да потпишат, а поддршка дадоа и активисти кои претходните месеци биле изложени на притисоци. Поранешниот кошаркар и активист Владимир Штимац истакна дека верува во студентите и нивните акции, додека д-р Владимир Дугалиќ оцени дека оваа акција може да покаже дека енергијата на студентското движење не е згасната.
Студентите изразуваат надеж дека денешниот одѕив е почеток на период со подобри денови и појасна перспектива за иднината.
Ј. Ѓ.
