Додека работниците излегоа на улица барајќи повисоки плати, владејачката партија тврди дека имаме „историско зголемување на платите“.
Утрово Сојузот на синдикатите на Македонија започна блокада на улиците „Даме Груев“ и „11 Октомври“ пред Собранието, како дел од втората фаза од синдикалните активности за зголемување на работничките плати.
Претседателот на ССМ, Слободан Трендафилов, порача дека синдикатот нема да се откаже од барањата за зголемување на минималната плата на 600 евра и раст на сите останати плати за најмалку 6.000 денари. Тој нагласи дека блокадата е директен одговор на, како што рече, едногодишното игнорирање на работничките барања од страна на пратениците.
„Токму тие го блокираат Законот за минимална плата повеќе од една година, а за истиот период секое семејство во државата е посиромашно за 9.500 денари месечно, бидејќи вредноста на синдикалната минимална кошница е зголемена за тој износ“, изјави Трендафилов.
Според него, пратениците се „глуви и слепи“ не само за барањата за повисока минимална плата, туку и за иницијативата за намалување на нивните примања. Ова е прва од трите најавени блокади, по која, според ССМ, ќе следат блокади на работодавачите и на Владата.
Трендафилов најави дека пратениците први ќе се соочат со последиците од блокадите.
„Поради утрешната блокада тие нема да можат да наплатат трошоци за доаѓање на работа, кои изнесуваат од 100 евра па нагоре. Така ќе им покажеме дека, како што работниците одат на работа пеш или со јавен превоз, така ќе мораат и тие“, рече тој.
Наспроти протестите, пратеникот на ВМРО-ДПМНЕ, Петар Ристески, во емисијата „Само вистини“ на телевизија Канал 5 изјави дека во земјата веќе има „историско зголемување на платите“.
Ристески рече дека платите во образованието и здравството веќе се зголемени, а од март следи зголемување и во администрацијата. Тој истакна дека Владата предводена од ВМРО-ДПМНЕ склучила договор со синдикатите за раст на платите до 40 проценти до 2028 година, оценувајќи дека станува збор за најголемо зголемување во текот на еден мандат.
Пратеникот Ристески од Прилеп и е познат на македонската јавност како рекордер по патните трошоци.
Тој бил како што самиот вели рекордер за исплатени патни трошоци од Собранието, во 2024 година и земал 14.300 евра.
Ристески во една прилиука во тв гостување, изјави: Зијан сум, не сум злоупотребил ниту денар – автомобилот го купив 35 илјади евра сега не можам да го продадам ни 15 илјади евра.
Додека владејачкото мнозинство зборува за историски раст на плати и идни проценти, синдикатите порачуваат дека работниците живеат во сегашност во која минималната плата не ги покрива основните трошоци за живот – поради што протестите, како што најавуваат, ќе продолжат.
Ј. Ѓорѓиоски
