Британскиот крал Чарлс во рамките на својата државна посета на САД денеска ќе се обрати пред американскиот Конгрес, каде се очекува да порача дека двете нации отсекогаш наоѓале начини да се обединат низ историјата. Овој централен настан од вториот ден на посетата доаѓа во исклучително специфичен политички момент, со оглед на тоа што безбедноста во Вашингтон е на највисоко ниво по неодамнешниот вооружен напад врз настан на претседателот Доналд Трамп, додека билатералните односи се оптоварени со критиките на американскиот лидер упатени до премиерот Кир Стармер за неговиот однос кон војната во Иран, пренесува Би-Би-Си.
Кралот во својот говор, кој е подготвен во соработка со британската влада и се очекува да трае околу 20 минути, ќе изрази сочувство за неодамнешниот напад во главниот град и ќе повика на „помирување и обнова“ на партнерството меѓу Лондон и Вашингтон. Монархот ќе нагласи дека во времиња на големи меѓународни предизвици е неопходно да се бранат демократските вредности, толеранцијата и еднаквоста, притоа потенцирајќи ја важноста на поддршката за НАТО и заштитата на Украина. Според кралски извори, Чарлс пред американските пратеници ќе порача дека трансатлантската алијанса е изградена врз должноста да се поттикнува сочувство и да се промовира мирот меѓу сите луѓе, без оглед на нивната вероисповед.
Посетата, која е прва на еден британски монарх по онаа на кралицата Елизабета Втора во 2007 година, започна во понеделникот со срдечен, но симболичен пречек во Белата куќа. Кралот и кралицата Камила беа пречекани од претседателот Трамп и првата дама Меланија, при што имаа можност да видат необичен дипломатски подарок – нова пчелна кошница во форма на минијатурна Бела куќа, гест наменет за кралот кој е познат поддржувач на пчеларството. Оваа државна посета се смета за обид за зајакнување на „меката моќ“ во годината кога САД одбележуваат 250 години од својата независност, навраќајќи се на слични историски посети кои служеле за заздравување на сојузништвото по големи кризи.
Паралелно со политичките средби, кралицата Камила посвети време на социјални прашања, разговарајќи со организации кои се борат против семејното насилство, тема која е блиска до нејзините долгогодишни заложби. Иако имаше повици кралската двојка да се сретне со жртвите на Џефри Епстин, таква средба не беше реализирана поради ризик од загрозување на тековните правни процеси. По обраќањето во Конгресот, денот ќе заврши со свечена државна вечера во Белата куќа каде ќе присуствуваат бројни политички и јавни личности од двете страни на Атлантикот, каде свој говор ќе одржи и претседателот Трамп.
