ВАШИНГТОН – Американскиот претседател Доналд Трамп објави дека Министерството за војна ја пуштило во јавност првата транша владини документи поврзани со неидентификувани воздушни феномени (UAP) и неидентификувани летечки објекти (НЛО).
Во соопштението кое го пренесе и Белата куќа, претседателот истакна дека ова е исполнување на неговото ветување за „целосна и максимална транспарентност“ кон граѓаните. Според Трамп, тој лично ѝ наредил на својата администрација да ги идентификува и обезбеди сите владини досиеја поврзани со вонземски живот и екстратерестријални феномени.
„За разлика од претходните администрации кои не беа транспарентни на оваа тема, со овие нови документи и видеа, луѓето можат сами да одлучат: ’Што по ѓаволите се случува?‘ Забавувајте се и уживајте!“, стои во пораката на претседателот.
Сите декласифицирани материјали, кои се отворени за преглед и проучување од страна на јавноста, се официјално достапни на веб-страницата на министерството (war.gov/UFO).
Меѓу најинтригантните материјали кои веќе предизвикаа бура на интернет се:
Случајот од 2023 година: Визуелна реконструкција од лабораторијата на ФБИ која прикажува масивен бронзен објект со елипсовидна форма, за кој очевидци тврдат дека се појавил од силна светлина на небото и исчезнал во дел од секундата.
Снимки од Месечината: Архива од мисијата „Аполо 17“ на НАСА, каде се забележани три необјаснети извори на светлина над лунарната површина.
Инциденти во воздушниот простор: Инфрацрвени снимки од 2025 година над западниот дел на САД, како и извештаи од американски воени пилоти за средби со неидентификувани објекти во африканскиот и јапонскиот воздушен простор.
Без конечни одговори
Иако документите нудат фасцинантен увид во тоа како американската влада ги следела овие феномени, експертите нагласуваат дека објавувањето не претставува дефинитивен доказ за постоење на вонземски живот. Станува збор за „нерешени случаи“ за кои агенциите едноставно немаат научно објаснување.
Директорката на Националното разузнавање, Тулси Габард, потврди дека ова е само почеток на процесот. Во следните неколку недели се очекува сукцесивно објавување на илјадници нови страници, со што на јавноста ќе ѝ се овозможи досега невиден пристап до најголемите тајни на американската војска.
Редакција Фронтлајн
