Министерката за финансии Нина Ангеловска на денешната прес-конференција ја претстави реализацијата на Буџетот во април оваа година и ги спореди со ланските резултати.
Буџетските приходи имаат 14,2 милијарди денари, или 20% помалку од тие во април минатата година. Даночните приходи во април имаат пад од 31% споредено со тие во април 2019, истакна Ангеловска. Придонесите се на исто ниво со ланските, а другите приходи имаат 20% пад на годишна основа. Овој пад во приходната страна во буџетот е очекуван со оглед на рестриктивните мерки и корона кризата, посочи министерката Ангеловска и рече дека падот е помал од она што било проектирано во министерството. Разработеното сценарио било попретпазливо од планираното, нагласи министерката.
Министерката Ангеловска истакна дека приходите по основ на ДДВ се остварени помалку за 43,5% во однос на тие лани во април. Овие резултати се очекувани бидејќи имавме запирање на економската активност, угостителската дејност, услужните дејности и транспортниот сектор, истакна Ангеловска.
Ангеловска посочи дека персоналниот данок на доход има пад од 11,7 проценти, акцизите имаат пад од 40%. Царината како што истакна Ангеловска имала помала наплата за 26% споредено со април лани.
Најголемо или позитивно изненадување имаме кај Данокот на добивка, каде има раст од 3,6% во однос на лани, што говори за успешните резултати на компаниите во минатата година.
Има зголемување кај трансферите за 7% заради зголемените пензии оваа година, а расходите, вели Ангеловска, се на исто ниво како април минатата година.
„Наплатата на придонесите во однос на минатат година има раст од 9,2% што е показател дека 2020 година започна одлично со раст на вработеноста и раст на платите. Мерката за поддршка за покачување на платите на вработените во приватниот сектор ја искористија над 22 илјади компании што резултираше со раст на платите на колу 120 илјади работници“, потенцира Ангеловска.
Проекцијата на Министерството за финансии сега според коригираните проекции, е дека ќе ја завршиме годината со забавување на економијата од 3,4%, а најголеми штети по економијата од коронакризата се очекува да има во второто тромесечје, а веќе во четвртото се очекува закрепнување и позитивен резултат.
Проекциите на меѓународните финансиски институции, пак, очекуваат негативни економски резултати во целиот свет. Меѓународниот монетарен фонд за земјите од ЕУ предвидува пад на економијата од 7,1%, а за македонската економија ММФ предвиде пад од 4%. Кон крајот на април Светската банка излезе со проекција дека македонската економија ќе претрпи најмала економска штета во однос на сите земји од регионот.
Ј. Ѓорѓиоски
