Речиси 600 земјоделски проекти се подготвени во Хрватска за финансирање од новиот Европски фонд за закрепнување, од кои третина се во висока фаза на завршување. Тоа денеска го нагласи хрватската министерка за земјоделство Марија Вучковиќ.
– Пред околу 20 дена, започнавме со пријави до базата на податоци за развојни проекти поврзани со земјоделството, а до вчера примивме речиси 600 регистрирани проекти, од кои една третина веќе потврдија големи проекти или целосно подготвена проектно-техничка документација, изјави таа.
Вучковиќ додаде дека проектите биле пријавени од мали земјоделци, единици на локалната самоуправа и преработувачката индустрија.
Хрватска може да смета на 200 милиони евра од фондот за земјоделска политика на следната генерација на ЕУ, но проектите за рурален развој може да се финансираат и од општ буџет што го доби според планот. Станува збор за 9,4 милијарди евра, од кои 5,94 милијарди се грантови.
Во наредниот седумгодишен буџетски период, 4,7 милијарди евра се на располагање на земјоделството – 4,5 милијарди од редовниот буџет од 2021 до 2027 година и уште 200 милиони од планот за закрепнување што треба да се потрошат во следните две до три години./МИА/
