По одлуката на премиерот Заев да го назначи универзитетскиот професор и поранешен премиер, проф. Владо Бучковски, на позицијата Специјален претставник на македонската Влада за Бугарија, во јавноста настапи бран критики, напади и контранапади. Зошто токму Бучковски? Дали овој избор е случаен?
Ако се пребара архивата, ќе се забележи дека оваа одлука на премиерот ни најмалку не е случајна. Бројни се меѓународните контакти и постигнувања на Бучковски во периодот кога тој беше премиер, но и пред и потоа. За оваа прилика ќе издвоиме само некои.
Во својство на премиер, Бучковски беше во официјална посета во Белата куќа и имаше официјален состанок со американскиот претседател Џорџ Буш. Запрашан во врска со оваа посета на Белата куќа во 2005 година, проф. Бучковски се сеќава:
„На таа средба, претседателот Буш беше исклучително срдечен и наместо 45 минути, имавме средба од близу 60 минути, плус заеднички дадовме изјави од Овалната соба. Буш го започна разговорот крајно неформално: Добредојде драг пријателе, да те прашам нешто на почетокот за Вилма (сопругата на трагично загинатиот Претседател Трајковски). Како е, како се децата? На крајот на состанокот заврши со прашањето: Што можам јас лично да направам за Македонија, а Вам Ви е приоритет? Јас, министерката Митрева и министерот Фатмир Бесими, како и амбасадорот Никола Димитров, побаравме да се слушне телефонски со британскиот премиер Тони Блер и да лобира за нашиот кандидатски статус во ЕУ на самитот во декември таа година за време на британското претседателство. Тој се насмеа и го задолжи својот шеф на кабинет да закаже телефонски разговор со Блер во текот на наредните денови! И тоа навистина го сторил. Тоа ни го потврди Блер при нашата средба во Брајтон.“
Истото прашање му го поставивме на Бучковски и за средбата со секретарот за одбрана на САД, Доналд Рамсфелд, есента 2004 година, кога Бучковски беше министер за одбрана.
„Тој дојде во официјална посета, при што ги одликуваше нашите војници за учеството во мисијата „Слобода за Ирак“. Тој ми стана многу близок. Направи неверојатен гест во октомври 2005 година, кога ја побаравме нашата нова амбасада во Вашингтон. Надвор од протоколот, се појави и одржа поздравен говор“ – се сеќава Бучковски.
И со бугарскиот премиер Саксобурготски, тогашниот премиер Бучковски беше во добри и пријателски односи.
Бучковски имаше плодни и срдечни средби и со канцеларот Шредер и канцеларката Меркел во 2005 и 2006 година.
„Шредер како социјалдемократ многу силно ја поддржуваше нашата Влада на патот кон ЕУ. Интересно е што јас за советник го имав легендарниот германски министер за финансии Тео Вајгел, кој беше голем пријател со Меркел. Заедно со него, на покана на Меркел, бевме на отворањето на Светското првенство во фудбал во јуни 2006 година.
Ова искуствона Специјалниот претставник Бучковски не се гаранција за успех во надминувањето на новонастанатиот проблем со Бугарија, но ја манифестира волјата на премиерот Заев и на македонската влада, со сета сериозност и со добар тим, да вложи максимални напори во надминување на предизвиците во ЕУ интеграцискиот процес.
Првата следна шанса за надминување на оваа пречка на патот кон ЕУ е на 9 декември, на состанокот на Советот на министри на ЕУ.
Д. Е.
