Во Основниот кривичен суд во Скопје денеска почна главната расправа за организација на насилствата на 27 април 2017 година во Собранието. Во него обвинети се поранешниот собраниски спикер Трајко Вељаноски, поранешните министри за транспорт и врски и за труд и социјална политика Миле Јанакиески и Спиро Ристовски, како и екс директорот на УБК Владимир Атанасовски. Тие се товарат за кривично дело- терористичко загрозување на уставниот поредок и безбедноста, пренесе Радио Слободна Европа.
Ристовски и Вељаноски денеска рекоа дека не се чувствуваат виновни и дека се цел на политички прогон. Јанакиески рече дека невиноста ќе ја докажел низ постапката, а Атанасовски кратко кажа дека не се чувствува виновен.
Обвинителката Вилма Русковска, која го води случајот, пак, рече дека ќе докаже оти обвинетите изготвиле план за да го загрозат уставниот поредок и безбедноста и да спречат мирно предавање на власта. Според неа, тие биле коцките од мозаикот, а нивните услогласени дејствија придонеле тој да функционира.