ЕУ денеска ја потврдува одлуката за преговори со С. Македонија и Албанија. Шефовите на држави или влади на Европската унија денеска треба да го потврдат ставот од заклучоците на шефовите на дипломатијата на Унијата кои ги одобрија пристапните преговори со Северна Македонија и Албанија. Тие ќе ја повторат и својата заложба за „Зајакнување на процесот на проширување“ и „Веродостојна перспектива на ЕУ за Западен Балкан“, нова методологија на процесите што го води регионот кон Унијата.
Петнаесетина здравствени работници заразени со корона вирус. Од вкупно 177-те досега заразени со коронавирусот во земјава, 14 или 15 се здравствени работници од Скопје, Кавадарци, Дебар и Куманово. Трета жртва од КОВИД-19 во земјава и втора од Дебар. Пациентката на 66 години која неколку дена беше во тешка состојба и на машина за дишење почина вчера на Клиниката за инфективни болести. Со нејзиниот сопруг беше дијагностицирана на 6 март откако допатувале од Италија.
Заев на ФБ: Солидарност народе мој! Мораме да ги поддржиме работниците и фирмите, затоа што доминантно тие го полнат буџетот, го развиваат бруто домашниот продукт, обезбедуваат плати на нашиот народ, плаќаат даноци и давачки и го генерираат севкупниот развој на нашата земја, напиша Заев.
Владата донесе Уредба: Банките ќе можат да понудат промена на договорните услови за кредитите. Со уредбата се утврдува како во текот на вонредната состојба да се остварат можностите дадени со регулаторните измени донесени од Народната банка, насочени кон олеснување на финансискиот товар на граѓаните и на фирмите кои заради коронакризата се соочуваат или би можело да се соочат со реални потешкотии во исплатата на кредитите во банките и штедилниците, информираше владината прес-служба.
На Уредбата работеа Народната банка, Министерството за финансии и Македонската банкарска асоцијација.
Сметководителите погодени од кризата со корона вирусот, ќе испорачаат предлог-барања за поддршка. Многу од нив најавуваат и затворање на своите бизниси, со што повеќе од извесно е дека приходите брзо опаѓаат, стои во најавата за прес-конференцијата на Комората на сметководители, закажана за денеска.
Среде пандемија, Косово остана без влада. Недовербата беше иницирана од вториот коалициски партнер, Демократскиот Сојуз на Косово откако премиерот Албин Курти, го разреши минитерот за внатрешни работи од оваа партија, Агим Велиу, со обвинение дека создал паника со лажна изјава поврзана со ситуацијата со корона вирусот во Косово.