Првите луѓе на Светската здравствена организација и натаму на луѓето им препорачуваат да не носат маски за лице, освен ако не се заразени со корона вирусот или негуваат болни.
Директорот на СЗО за вонредни ситуации Мајкл Рајан изјави дека не постојат конкретни докази кои би сугерирале дека масовното носење маски носи потенцијална корист, но истакна дека неправилното користење може да донесе повеќе штета отколку корист во борбата против ширењето на корона вирусот, пренесе Си-Ен-Ен.
Тој истакна дека СЗО верува дека маските треба да ги носат луѓе кои се болни и здравствените работници, на кои им се неопходни.
-Постои и глобален проблем од недостиг на маски и други медицински препарати за заштита. Луѓе кои најмногу се изложени на ризик се здравствените работници, кои секоја секунда во денот се изложени на опасноста. Помислата дека немаат маски е ужасна, кажа Рајан на брифинг со новинарите во Женева.
