Претседателот Стево Пендаровски, по прогласувањето на вонредна состојба во времетраење од 14 дена, потенцира дека прогласувањето е потребно за справување со економските последици и опфаќање на здравствените препораки.
Нова вонредна состојба во траење од 14 дена ни е потребна исклучиво за справување со економските последици од пандемијата на Ковид-19, како и за заокружување на здравствените одговори. Потенцирам дека ограничувањето на движењето, затворањето на училиштата, градинките и на стопанските објекти, не се директни последици на вонредната состојба.
Овие мерки можат да се укинат дури и во вонредна состојба. На денешната седница на Советот за безбедност сите се согласивме дека стратегијата за справување со кризата дава резултати и дека државата соодветно се справува со овој огромен предизвик. Се надевам дека ќе го зачуваме заедништвото кое го покажавме во изминативе 2 месеци и дека и натаму ќе се поддржуваме едни со други, за полесно да се справиме со последиците од пандемијата, се вели во постот на Фејсбук на претседателот Пендаровски.
