Три години СДСМ преку владата што ја предводи покажува што значи вистинска грижа за земјоделците. Со одговорни и чесни политики, го вративме достоинството на нашиот земјоделец, го цениме и вреднуваме неговиот труд. За само три години финансиската поддршка во земјоделството стигна до рекорден износ од 430 милиони евра и стигнува до вистинските индивидуални земјоделци, порача лидерот на СДСМ Зоран Заев.
Тој додаде дека субвенциите се зголемени и оти нивната исплата денес е неселективна, редовна и, како што рече, што е најважно навремена, а земјоделците парите ги добиваат тогаш кога им се најпотребни.
-За производството на тутун по кое е позната општина Кривогаштани, но и целиот Прилепски регион обезбедивме зголемување на субвенциите и тоа 80 денари за прва класа, 70 денари за втора и 60 денари за трета,четврта и дополнителните класи. Тоа значи повеќе пари кај земјоделците кои ја одгледуваат оваа култура, но и мотив да одгледуваат поквалитетни класи на тутун. Оваа година земјоделците вкупно кои произведуваа тутун инкасираа во своите семејни буџети повеќе од 125 милиони евра, рече тој.
Претседателот на СДСМ вели дека заложбата на оваа партија во следните четири години е јасна – поддршка кон тутунопроизводителите, но и кон сите земјоделци, градинари и сточари да продолжи да расте уште повеќе.
-Обезбедуваме годишна финансиска поддршка за земјоделството и руралниот развој од 200 милиони евра.
Воведуваме целосно субвенционирање на „зелената нафта“ за нашите земјоделци. За да обезбедиме сигурен пласман градиме три нови откупно-дистрибутивни центри во државата. Поддршката кон младите земјоделци, кон жените земјоделки продолжува уште повеќе и уште подобро. Обезбедуваме и субвенционирање на платите од 3.000 денари на нововработени работници во земјоделско стопанство помлади од 25 години.
Важно ни е земјоделството, важни ни се земјоделците, затоа, грижата за нив во следните четири години продолжува уште повеќе, истакна заев во Кривогаштани.
Убедени сме, вели тој, дека земјоделците гледаат кој навистина се грижи за нив, а кој 11 години како власт и три години како опозиција ги манипулира и го погазува нивниот труд. Затоа е уверен дека на 15 јули земјоделците ќе изберат повисоки субвенции, сигурен пласман и повеќе пари во своите буџети и нема да дозволат повторно ВМРО-ДПМНЕ да гази врз нивниот труд.
