„Светскиот ден на ретките болести годинава го одбележуваме во околности во кои милиони жители на планетата боледуваат од болест која до вчера беше непозната. Пандемијата што ги промени нашите животи од корен, уште еднаш не натера да се ставиме во кожата на стотици наши сограѓани кои секојдневно се борат со т.н. ретки болести – болести за кои малку се знае, болести за кои терапиите се скапи или ги нема, болести за кои недостигаат научни истражувања или здравствениот систем не ги признава. Да се живее во такви околности, ќе се сложите, не е нималку лесно. Затоа, СДСМ, како одговорна политичка партија воведе системски пристап на грижа за луѓето кои живеат со ретка болест и го зголеми бројот на достапни лекови, информира Тера.мк.
Политиките донесени во последните 4 години сосема го променија пристапот кон справувањето со ретките болести и грижата за пациентите:
– Зголемен е бројот на пациенти кои примаат терапија преку Фондот за здравствено осигурување;
– Го зголемивме буџетот за ретки болести. Во 2017 година тој изнесуваше 213 милиони денари, а во 2020 година е дуплиран и изнесуваше 527 милиони денари;
– Зголемен е и бројот на лекови и достапни терапии за многу дијагнози и групи на ретки болести кои претходно не беа достапни во нашата земја;
– За првпат е воспоставен електронски регистар на ретки болести;
– Националната стратегија за ретки болести 2020-2030 дополнително ќе овозможи унапредување на законодавството според европските регулативи за лекови за ретки болести и унапредување на експертизата на медицинскиот персонал во Северна Македонија.
Во наредниот период, приоритетите на Владата предводена од СДСМ се насочени кон вреднување на потенцијалот на лицата кои боледуваат од ретка болест, нивно прифаќање и поддршка во општеството. Ние се грижиме за секој еден подеднакво. Бидејќи … болеста може да е ретка, но грижата никако не смее да биде ретка“ рече пратеничката од Битола на СДСМ Бисера Костадиновска-Стојчевска.
