пишува: ЈАНЕ ЃОРЃИОСКИ
Сакав да пишам – не СМЕ со неа, но што има ни крив ни должен да се самовиктимизирам по којзнае кој пат и по којзнае на која тема, за да намалам од колективен терет, да се изземам, односно додадам, на некоја општо прифатена јавна критика или мислење.
Јас, со неа сум, тие, ете, одбираат да не се.
Очи и извадија на министерката, со најдолни мизогини напади и гаден говор на омраза, зашто таа, замислете, како министерка за одбрана на земја членка на НАТО, се осмели да каже дека во оваа руска манџа, Македонија е со НАТО сојузниците.
Да се чуди човек?!
Како со душа да чекаа да ја конзумираат потплатената руска пропаганда зачинета со кратки досетки пласирани на социјалните мрежи што ним им се гледаат симпатични (исто како што им се симпатични вицевите за „цигани“ и „црнци“ да речиме), па си ја голтаат здраво за готово мизогинијата, навредите кон министерката. Како така да треба, како така да ѝ треба. Онака се лигават, сеират, серат, им течат емотикони со сарказам додека добро платената пропагандна машина се насладува од учинокот – Охохо… колку е едноставно да се манипулира со таква една пивтија.
Не се со неа.
Не се ни со Украина, на која очи не ѝ извадија, но никако да се обидат барем да се солидаризираат со неа. Мечката за да покаже заби, за да покаже дека мора да ја играат, се спрема на Украина хируршки да ѝ отстрани важен орган од телото. Путин влегува во срцето на Украина, окупира територии, разместува специјални паравоени сили внатре, стотици илјади војници на граница, се заканува на цел свет дека ако не го остават на мир да ја силува суверената држава, ќе предизвика енергетска криза поголема од оваа што сега ја имаме, мавта со нуклеарки…
Тие што?
Тие, собираат од лигите на разјарениот диктатор, се размачкуваат со нив за да ги истакнат борбените бои, и да му кажат на Путин колку му се лојални. Го „заболе“ него за Македонија, исто како, историски гледано, некогаш Русија што ја има „заболено“ за Македонија. Слепци! Нема тука гледање на национален интерес. Нема тука запазување на контекст во кој би се гледала на пример нашата ситуација и како и врз нас се изживуваат по основ на сила и моќ. Од тој аспект не смее да се чепка. Никако! Не смеат да чепнат сега, ама плачат кога нè чепкаат нас.
Како тоа, ви се молам, да застанат позади еден суверен народ, позади една суверена држава, кога од друга страна се интересите на големиот им силен Путин и од него заузданата гасна и гнасна олигархија?!
Путинова Русија за Украина вели дека тие се измислена држава со измислена нација. Путиновци велат – не постоеле Украинци пред Втора светска војна. Ги потсетува ли ова на нешто што нам во моментов ни се случува? Ги потсетува курац!
Не се и со неа.
Со кого се?
