Дигиталната трансформација на нашите општества веќе одамна не е само технолошка визија на поединци или предмет на академски и стручни дискусии за иднината, туку е наша реалност. Дигитализацијата не само што ја олесни, забрза и направи широко достапна комуникацијата, туку, многу позначајно, суштински го промени начинот на кој работиме, размислуваме и ги градиме нашите вредносни системи, напиша македонскиот претседател Стево Пендаровски на Фејсбук.
„И покрај многуте значајни поместувања, информатичките системи уште долг период главно служеа како средства за автоматска обработка на податоци и за електронска комуникација. Клучната промена ја донесе големата здравствена криза од 2020-та, низ која сè уште поминуваме како последица на пандемијата на КОВИД-19. Сите релевантни податоци од последните две години потврдуваат дека пандемијата не беше голем предизвик само за нашите здравствени системи, туку и предизвик за државната управа и за правосудството.
Како и секоја криза, така и оваа е шанса за промени на подобро, под услов да сакаме да ги научиме лекциите од изминативе две години. Во таа смисла сметам дека овој самит е одлична прилика да се разговара за идните чекори во насока на прифаќање на дигиталната транзиција на правосудството, но, како потреба, а не како нужно зло во време на криза.
Имав задоволство утрово да се обратам на отворањето на Европскиот самит за дигитализација на судството на тема „Придобивките од четвртата индустриска револуција како механизам за враќање на довербата во правосудството“, кој во организација на Министерството за правда и Академијата за судии и јавни обвинители, а со поддршка на Мисијата на ОБСЕ во Скопје се одржува овие денови во Охрид“, рече Пендаровски.