Окупаторите повторно вршеле напади врз Сумската област, Миколајив и областа и Днипропетровската област. Дел од ракетите беа соборени од нашите противвоздушни сили. И ние ниту еден ден не ја намаливме и нема да ја намалиме нашата дипломатска активност за да добиеме модерни и доволни противракетни системи за Украина, истакна украинскиот претседател Володимир Зеленски во своето обраќање.
„Ноќта на 5 јули беше прогласена воздушна тревога на речиси целата територија на нашата држава. Пред тоа, веќе некое време немаше воздушни тревоги во главниот град и во некои области, а некои луѓе дури се чувствуваа особено вознемирени поради таквата необична тишина. Мислеа на нешто, се плашеа од нешто, бараа некакво објаснување, како окупаторите да се подготвуваат за нешто… Всушност, не треба да се вознемирувате. Не треба да барате логика во дејствијата на терористите. Руската армија не прави никакви паузи. Таа има една задача – да ги одземе животите на луѓето, да ги заплашува луѓето, така што и неколку дена без воздушна тревога веќе се чувствуваат како дел од теророт. И оваа вечер, Кијив и повторно речиси цела Украина – со воздушна тревога. Во овој час има напади врз Хмелницката област: жртви, ранети – во моментов се утврдуваат.
Наша задача со вас е да се држиме, да се заштитиме себеси, особено да ги заштитиме нашите емоции, да помогнеме во одбраната на земјата што е можно повеќе, да ја заштитиме државата, колку што ќе биде потребно за нашата победа.
Окупаторите повторно вршеле напади врз Сумската област, Миколајив и областа и Днипропетровската област. Дел од ракетите беа соборени од нашите противвоздушни сили. И ние ниту еден ден не ја намаливме и нема да ја намалиме нашата дипломатска активност за да добиеме модерни и доволни противракетни системи за Украина.
Ова е примарна задача за нашата држава – веќе оваа година да обезбеди основна безбедност за Украинците, основна заштита од ракетни напади. Но, исполнувањето на оваа задача не зависи само од нас, туку и од разбирањето на нашите основни потреби од страна на нашите партнери.
Денес разговарав со британскиот Премиер Борис Џонсон. Му се заблагодарив што ја зголеми безбедносната помош за нашата држава за уште стотина милиони фунти, како додаток на пакетот за поддршка на одбраната од милијарди фунти објавен неодамна. Ова е многу опиплива помош за нас.
Со Борис разговаравме и за системот на безбедносни гаранции за Украина, кој го развиваме, кој треба да функционира долгорочно за нашиот народ.
Учествував заедно со претседателите на Молдавија и Грција во формат на специјална конференција на списанието The Economist. Ова е веќе 26-ти ваков годишен настан, а оваа година секако клучни зборови беа „Украина“ и „безбедност“. Зошто ни треба на нас ова? На нашата држава веќе сега ѝ треба сигурност со безбеден простор. Работиме многу активно за да обезбедиме сите наши партнери и во Европа и на другите континенти да ја разберат нашата визија за безбедносни гаранции.
Денес беа сумирани резултатите од двомесечната работа на државната хуманитарна платформа United24. За тоа време, благодарение на учеството на луѓе од десетици земји, беше можно да се соберат повеќе од две милијарди гривни за потребите на Украина. Ова не е само помош за нашите бранители, туку и придонес за деминирање и хуманитарни потреби.
Јас лично му се заблагодарив на Лиев Шрајбер, многу познат актер, што се приклучи на United24 како амбасадор. Тој е ко-основач на добротворната организација BlueCheck, која финансираше програми за психолошка поддршка и евакуација на повеќе од дваесет илјади сирачиња од интернати и сиропиталишта во Харкивската, Днипропетровската, Чернигивската и Одеската област. Организацијата на Лиев им помага и на семејствата на внатрешно расселени лица во Лвив. Сега тој заедно со Андриј Шевченко и Елина Свитолина ќе работи во хуманитарен правец.
И уште една многу важна работа. Денес во општеството имаше многу полемики околу одлуката на Генералштабот на Вооружените Сили на Украина да ја одобри процедурата за добивање одредени дозволи за регрути и резервисти. Гледам дека има различни оценки за таквата одлука, има недоразбирање, па дури и огорченост во општеството. Им наложив на министерот за одбрана, началникот на Генералштабот, Главниот командант на Вооружените Сили да ме известат за сите детали за време на утрешниот редовен состанок на Штабот на Врховниот командант – една од точките од дневниот ред. На луѓето им ветувам дека детално ќе го изучам ова прашање.
И го замолувам Генералштабот понатаму да не носи слични одлуки без мене.“
