Министерството за образование и наука известува дека го одзема вршењето на работите на општина Тетово за именување и разрешување на директор на Средното општинско училиште Гимназија „Кирил Пејчиновиќ“ – Општина Тетово, затоа што и покрај укажувањата и преземените мерки и активности од Државниот просветен инспекторат, не обезбедила извршувањето на работите кои со закон се утврдени како нејзина надлежност.
Државниот просветен инспекторат на 8 јули го извести Министерството за образование и наука дека е извршен вонреден инспекциски надзор во СОУГ „Кирил Пејчиновиќ“ во општина Тетово, по иницијатива на разрешениот директор на училиштето. Утврдено е дека Градоначалникот на Општина Тетово го разрешил директорот без претходно спроведена постапка согласно закон и именувал вршител на должноста директор, пишува во соопштението.
Од МОН известуваат дека инспекторатот му укажал на Градоначалникот за незаконитата постапка. Согласно Закон, Инспекторатот извршил контролен инспекциски надзор, со цел да утврди дали Градоначалникот на Општина Општина Тетово, постапил по Укажувањето. Утврдено е дека Решението за разрешување на директорот се уште не е поништено, а како што пишува во соопштението функцијата вршител на должност се уште ја врши новоименуваниот директор.
Вршењето на одземените работи, согласно Закон, го презема Министерството за образование и наука, во име и за сметка на општината во траење од 12 месеци, информираат од МОН.
