Граѓаните да внимаваат при посета на шуми и паркови и да се воздржуваат од активности кои можат да предивикаат пожари, апелираат од Националниот парк „Шар Планина“. Поради настапувањето на топлотниот бран и високите температури има голема опасност лесно да се запали шума, заради што од паркот информираат дека забрането е палење оган, подготовка на скара на неозначени места за таа намена, фрлање догорчиња од цигари и секаков лесно запалив отпад и материјал.
Во текот на изминатите неколку денови на територијата на целата земја се појавија пожари на повеќе локации. На потегот помеѓу селата Митрашинци и Будинарци гореше голема површина со дабова и нискостеблеста шума, што го гаснеа 36 пожарникари со осум возила, а беше активиран и авионот AIR TRACTOR за гасење на шумски пожар. Од Дирекцијата за заштита и спасување информираа дека овој пожар е локализиран, а во текот на денот на теренот ќе биде направена контрола и ќе дежураат и екипи од Малешево Шумско Берово.
Пожарникарите од Старо Нагоричане вчера гаселе пожар на помошен објект полн со огревни дрва и трупци, кој потоа се проширил и ја зафатил околната нискостеблеста шума на површина од три хектари во село Стрезовце. Според Центарот за управување со кризи од Куманово, кумановската противпожарна единица, изминатово деноноќие гасела пожар и во месноста „Ливади“ во населбата Карпош, каде горела сува трева и ѓубре.
Пожар избувна и на депонијата „Врадариште“ во Скопје, а според информациите од скопската Бригада за противпожарна заштита, пожарот го гаснеле две противпожарни возила. Поради високите температури се самозапали и депонијата „Трештена Скала“ во Штип, откако гореше и пред неколку дена, кога несовесен граѓанин во неа исфрлил индустриско масло.
Извор: МЕТА
