Неопходно е да се реши една исклучително важна национална задача: украинската гледна точка треба да се види и чуе во оние делови од светот каде што руската пропаганда е сè уште многу гласна. Ова се однесува на регионот на Пацификот, земјите од Јужна и Источна Азија, арапскиот свет, Африка и Латинска Америка. И затоа е потребна информативна поддршка од сите наши луѓе и сите пријатели во странство чиј глас може да се слушне, истакна украинскиот претседател Зеленски во своето обраќање.
„Деновиве во нашиот информативен простор и на социјалните мрежи има многу извеsтувања за конфликтни ситуации и закани кои постојат на други географски места. Прво – Балканот, потоа – Тајван, сега можеби е Кавказ… Сите овие ситуации изгледаат поинакви, иако ги обединува еден фактор, а тоа е: глобалната безбедносна архитектура не функционира. Ако функционираше, немаше да го има сиот овој конфликт.
И ова е всушност она на што Украина обрнува внимание не само 161 ден по почетокот на војната од големи размери, туку со години. Од тоа време кога Русија целосно го игнорираше меѓународното право, интересите на човештвото како такви целосно.
2014 година беше пресвртница. Тогаш, во сосема очигледни ситуации – со Крим, со Донбас, со соборениот малезиски Боинг – Русија избегна непосредна и опиплива одговорност, ги зачува деловните и политичките врски со светот… И сега многумина во глобалните односи веруваат дека ќе успеат.
Затоа Украинците сега прават многу важна работа за сите во светот. Нашиот народ го обедини слободниот свет не само околу нивната борба за слобода, туку и околу разбирањето колку е кревка нашата слобода. Слободата на секој народ во Европа и во другите делови на светот.
Оваа кревкост може да се заштити само со заеднички дејствија, а за тоа да функционира на долг рок, мора да постои ефикасна глобална безбедносна архитектура која гарантира дека ниту една држава никогаш повеќе не може да прибегне кон терор против друга држава.
На системско ниво, на ниво на глобални институции, токму за тоа работиме во моментов – и украинската држава и сите наши партнери.
Денес разговарав со студентската заедница на Австралија. Повеќе од 20 универзитети, како и интересот на водечките австралиски медиуми, политичари. Ги повикав сите наши австралиски пријатели да ни помогнат во информативната војна и колку што е можно повеќе да ја шират вистината за украинската одбрана и рускиот терор.
Неопходно е да се реши една исклучително важна национална задача: украинската гледна точка треба да се види и чуе во оние делови од светот каде што руската пропаганда е сè уште многу гласна. Ова се однесува на регионот на Пацификот, земјите од Јужна и Источна Азија, арапскиот свет, Африка и Латинска Америка. И затоа е потребна информативна поддршка од сите наши луѓе и сите пријатели во странство чиј глас може да се слушне.
Денес се сретнав со Министерот за надворешни работи на Естонија, кој беше во посета на Украина. Му се заблагодарив што посетата ја започна со темата за обновување на Украина. Во Житомирската област, во рамките на нашиот план за брзо обновување – Fast Recovery рlan – ќе започне изградбата на првата детска градинка од петнаесет објекти што и беа предложени на естонската влада да помогнат во реконструкцијата на областа. Ова е исклучително важно во моментов – кога раселените луѓе се враќаат дома.
Естонија е една од оние земји кои почнаа да ни помагаат уште пред 24 февруари и чија поддршка стана исклучително важна. Украина секогаш ќе го памети ова.
Швајцарија денеска се приклучи на седмиот пакет санкции на Европската унија – и јас сум ѝ благодарен за тоа. Кога таква земја не останува неутрална во заштитата на вредностите и човечкиот морал, тоа е многу важен сигнал за целиот свет.
Сега се чувствува дека Русија почна да ја сфаќа неизбежноста да биде признаена како терористичка држава. По сето она што го направи руската армија и наводно приватните руски воени компании, ниту една друга терористичка организација во светот не може да го преземе приматот во теророт. Русија дефинитивно е број еден меѓу терористите. И ова дефинитивно заслужува правни последици, особено во одлуките на САД и другите светски субјекти.
И токму поради ова, се појави нов бран на пропагандна активност од Москва. Одеднаш решија „Азовците“ да ги дефинираат како терористи, иако кога терористичката држава го прави ова, очигледно е апсурдно. Активираат разни емисари со тези дека наводно терористичката држава сака преговори… Ако Русија навистина сакаше крај на војната, немаше сега да ги повлече своите резерви на југот на Украина и немаше да произведува масовни гробници на убиените невини луѓе на украинска територија.
Па, и воопшто, едноставно е одвратно кога поранешните лидери на моќни држави со европски вредности работат за Русија, која се бори против овие вредности.
Затоа, треба да се бориме, треба да им нанесуваме удари на терористите на нашата земја, треба да шириме информации за украинските интереси и да постигнеме успех и победи за Украина. Секој и секоја на свое ниво – и Украинци и партнери. Теророт може да се запре само со заедничка нескротлива сила.
Потпишав нов указ за доделување награди на нашите војници. На 194 борци им беа доделени државни награди. 28 од нив – постхумно.
Вечен спомен на сите чии животи ги одзедоа терористите!“
