Писателот Салман Ружди, кој со години добиваше смртни закани по објавувањето на романот „Сатански стихови“, беше нападнат на сцената во американската држава Њујорк, пренесува Би-Би-Си.
Добитникот на Букеровата награда зборуваше во образовниот центар Чаутауква во моментот на нападот.
Полицијата на државата Њујорк соопшти дека Ружди бил прободен со нож во вратот и со хеликоптер бил пренесен во локална болница, а напаѓачот бил приведен.
На видеото објавено на Интернет, се гледаат посетителите како трчаат на бината веднаш по инцидентот.
Ружди, роден во Индија, стекна светска слава благодарение на романот „Деца на полноќ“ во 1981 година.
Тој роман е продаден во повеќе од милион примероци само во Велика Британија.
Но, за неговиот четврти роман, Сатанските стихови во 1988 година, Ружди беше принуден да се крие девет години.
Надреалистичкиот, постмодернистички роман предизвика бес кај некои муслимани, кои ја сметаа неговата содржина за богохулна и беше забранет во некои земји.
Една година по објавувањето на оваа книга, иранскиот врховен лидер ајатолахот Хомеини повика на атентат на Ружди и понуди награда од три милиони долари.
Во насилството што следеше по објавувањето на романот загинаа десетици луѓе, а загинаа и преведувачите на делото.
Наградата за главата на Ружди сè уште е на сила, иако иранската влада се огради од декретот на Хомеини.
Авторот, кој има британско и американско државјанство, е гласен поборник за слободата на изразување и безброј пати го бранел делото на романот.
Неговото појавување на настанот во државата Њујорк беше првото во серијата од седум предавања водени од непрофитната организација.
J. Ѓ.