Пишува: БОРЈАН ЈОВАНОВСКИ
Советот на министри на ЕУ денска ќе се соочи со едно од најтешките прашања кои навлегуваат длабоко во правилата на одлучување на европското семејство. На дневен ред се стави иницијативата на некои земји членки за укинување или ограничување на донесување на одлуки со консензус за прашањата за надворешни работи, кое на секоја земја-членка на блокот и дава право на вето. Иницијативата произлезе од заканата на официјална Будимпешта да става вето на одлуките за санкции против режимот на Путин.
„Јас сум доста оптимист дека е можно да се постигне напредок по прашањето за гласање со квалификувано мнозинство“, изјави германската државна министерка за Европа Ана Лирман пред денешната средба со нејзините колеги.
„Разговараме за областите каде што тоа би можело да биде можно, особено во областа на заедничката надворешна и безбедносна политика“, рече Лирман, каде одговорот на целиот блок кон Русија постојано беше „запрен од една членка. држава“. Таа додаде: „Мислам дека тоа не треба да не спречи да дејствуваме во иднина“.
За потсетување, Унгарија минатата недела сама ја блокираше ЕУ да побара известувач на ОН за руските прекршувања на човековите права.
На денешниот состанок министрите ги разгледуваат клаузулите на ЕУ – кои им овозможуваат на земјите да се префрлат од едногласно на мнозинство гласови во Советот, без потреба од промена на темелните договори на ЕУ.
Повеќето делегации се подготвени да размислат за користење на овие нови клаузули со кои ќе се надминат блокадите од поедини земји членки особено кога станува збор за санкции, човекови права, или други прашања од областа на заедничката надворешна и безбедносна политика.
Министрите за прашања на ЕУ, исто така, ќе разговараат за проблемите со владеењето на правото во некои земји членки како на пример Унгарија. ЕК минатата недела употреби – тешко оружје – со блокада на кохезивните фондови за Унгарија кои ги таргетираат највеќе земјоделците.
„Го поздравуваме тоа што Комисијата на ЕУ го искористи механизмот за условување за прв пат“, рече Лирман. „Мислам дека ова е многу јасен сигнал до другите земји-членки дека влошувањето на владеењето на правото ќе биде санкционирано и ќе има драстични последици ако не можеме да бидеме сигурни дека средствата на ЕУ се трошат на начин каков што е дефиниран во европските правила.“
Извор: НОВАТВ.МК
