Во просториите на Министерството за здравство на Северна Македонија денеска беше заокружено потпишувањето на трилатералниот Меморандум за разбирање помеѓу ова Министерство и Министерството за надворешни работи на Хеленската Република, како и Фондацијата за фетална медицина (Fetal Medicine Foundation) во врска со спроведувањето на заедничкиот проект за пренатален скрининг во државава во периодот од 2022 до 2025 година, информираат од Грчката амбасада во земјава.
Согласно Меморандумот, цел на проектот за пренатален скрининг во периодот од 2022 до 2025 година е да се обезбеди бесплатна специјализирана нега за бремени жени од Република Северна Македонија со цел да се ограничи мајчината и перинаталната смртност и заболување.
Проектот ќе биде спроведен од страна на Министерството за надворешни работи на Хеленската Република и Фондацијата за фетална медицина која е официјално регистрирана добротворна организација со седиште во Обединетото Кралство.
Меморандумот за разбирање го потпишаа во одделни прилики министерот за надворешни работи на Хеленската Република, Никос Дендиас, министерот за здравство на Северна Македонија, Беким Сали, и претставникот од Фондацијата за фетална медицина, проф. Кипрос Николаидис.
На настанот за завршното потпишување на Меморандумот за разбирање присуствуваа и амбасадорката на Хеленската Република во Скопје, Софиа Филипиду, придружувана од заменик-шефот на дипломатската мисија, Џина Андреади, и шефот на Канцеларијата за јавна дипломатија на грчката Амбасадата, Константинос Прокакис, како и министерот за здравство , Беким Сали, придружуван од државниот советник за здравство, Гордана Мајнова, и надворешниот советник за здравство, проф. д-р Ана Данева Маркова од Универзитската клиника за гинекологија и акушерство во Скопје.
Во рамки на проектот, во Универзитетската клиника за гинекологија и акушерство во Скопје, која е во тесна соработка со Медицинскиот факултет на Универзитетот „Св. Кирил и Методиј“ од Скопје, ќе биди отворен оддел за пренатален скрининг. Долгорочна цел е отворање вакви оддели и во останатите делови од земјава во корист на севкупното население.
Исто така, во рамки на проектот ќе биде достапна и постдипломска студиска програма за акушерски ултразвук и фетална медицина во траење од една година, што ќе биде организирана во соработка со Медицинскиот факултет на Универзитетот „Св. Кирил и Методиј“ и Асоцијацијата за фетална медицина на Република Северна Македонија. Студиската програма ќе опфаќа интензивна пракса на секојдневна база, теоретска обука преку интернет и дигитални медиуми и неделни состаноци за анализирање на конкретни случаи.
Дополнително, во проектот за пренатален скрининг ќе биде опфатена и професионална обука на акушери вработени во Универзитетската клиника за гинекологија и акушерство во Скопје, како и во регионалните болници од страна на Фондацијата за фетална медицина.
При спроведувањето на проектот за пренатален скрининг, од страна на Фондацијата за фетална медицина ќе биде обезбедена бесплатна опрема и експертиза, додека Министерството за надворешни работи на Хеленската Република ќе ја олеснува координацијата помеѓу Министерството за здравство на Република Северна Македонија и Фондацијата за фетална медицина –согласно дефинираното во Меморандумот за разбирање.
