Министерката за труд и социјална политика, Јованка Тренчевска присуствуваше на тркалезната маса: „Заедно во заштита на менталното здравје на децата и младите“ во Загреб, Република Хрватска, известуваат од Министерството за труд и социјална политика.
На почетокот од своето обраќање Тренчевска се заблагодари за можноста да присуствува на тркалезната маса и топлото добредојде од соработниците. Таа истакна дека темата која што ќе се дискутира е од особена важност за Министерството за труд и социјална политика и посочи дека создавањето средина во која секое дете ќе ги има потребните услови за раст и развој како и воспоставување социјални услуги за поддршка на семејствата и децата е клучна заложба на Република Северна Македонија.
„Владата на Република Северна Македонија е посветена на градење на сеопфатен пристап за заштита и превенција на децата од насилство. Поради тоа, формирано е Национално координативно тело за превенција и заштита на децата од злоупотреба и запоставување, со кое претседава министерот за труд и социјална политика. Ова тело ја создаде Националната стратегија за превенција и заштита на децата од насилство (2020-2025) и Акциониот план (2020-2022)“ рече Тренчевска.
Таа ги истакна нејзините лични заложби и заложбите на државата за заштитата на децата и спречувањето на пренесување на трансгенерациско насилство и сиромаштија. Таа посочи дека тоа е насоката по која ќе се работи во наредниот период.
„Министерството за труд и социјална политика е клучно и за децата на улица, кои се социјално загрозени, запоставени и запоставени. Затоа годинава го промовиравме „Протоколот за работа со деца на улица“ во кој покрај директната заштита на децата, за првпат се предвидува и работа со нивните родители, за зајакнување на нивните капацитети“ изјави Тренчевска.
На крајот од своето обраќање министерката рече дека досегашните имплементирани услуги кои се имаат покажано како успешни во системот на Хрватска ќе бидат клучни за Република Северна Македонија во развојот на нови услуги во системот на социјална заштита.
