- Русија изврши нови воздушни напади со дронови и ракетни баражи низ цела Украина, ден по одлуката на Германија и САД да испратат тенкови за украинската војска
- Загинаа 11 луѓе, ранети се исто толку, според последните податоци
- Агресорот изврши жестоки напади и врз Одеса, откако УНЕСКО го прогласи градот за „Светско наследство во опасност“
Немоќни на линиите на фронтот, Русите го истурија сиот свој бес и зло врз цивилите ширум Украина веднаш по најавите на Германија и САД дека ќе испратат десетици најсовремени тенкови за украинската војска. Рускиот ракетен терор веќе остави милиони луѓе без светлина, топлина и вода.
Украинската војска соопшти дека ги соборила сите 24 дронови, кои се со иранско потекло. Нападите со дронови беа извршени текот на ноќта, односно во мугрите, пред разделувањето. Само на небото над Кијив, украинската одбрана уништи 15 дронови. Украинците уништија 47 од 55 руски проектили. Осум проектили ја погодија целта во станбени подрачја и инфраструктура низ земјата
Рано изутрина, додека луѓето брзаа на работа, се огласија сирените за воздушен напад, како што претходно објави ЦИВИЛ Медиа. Метрото на Кијив беше главното засолниште во текот на денот.
Во нападите, според информациите на украинските власти, загинале 11 лица, а уште 11 се ранети.
Украинскиот министер за енергетика Херман Халушченко изјави дека енергетските капацитети се мета на руските сили кои „се обидуваат да предизвикаат системски дефект во енергетскиот систем на Украина“. Тој објави дека некои енергетски капацитети биле погодени, што резултирало сопрекини во смабдувањето, а екипите за поправка работат на што побрзо враќање на снабдувањето со електрична енергија.
Максим Марченко, гувернер на јужната украинска област Одеса, рече дека објектите на енергетската инфраструктура биле оштетени во неговиот и во неколку други региони, предизвикувајќи „значителни проблеми со снабдувањето со електрична енергија“.
Нападите на Одеса се случија веднаш откако француската министерка за надворешни работи, Кетрин Колона, пристигна во пристанишниот град на Црното Море, кое УНЕСКО вчера го прогласи за „Светско наследство во опасност“.
Колона требаше да се сретне со нејзиниот украински колега, Дмитро Кулеба, за да разговара за хуманитарна и воена помош, меѓу другото, за можноста и Франција да им се придружи на своите сојузници во НАТО во снабдувањето на Украина со борбени тенкови, модел Леклер.
И Москва и Кијив, кои досега се потпираа на тенковите Т-72 од советската ера, се очекува да ги интензивираат копнените офанзиви напролет.
На Украина ѝ се потребни стотици модерни тенкови за да ги пробие руските линии на фронтот долг повеќе од 1.600 километри и окупира делови од земјата на југ и на исток.
Подготви: Џ. Д.
