Собранието ги усвои ратификациите на законите од Отворен Балкан со кои се овозможува отстранување на работните дозволи и слободен пазар на труд за граѓаните на Северна Македонија, Србија и Албанија, извести во објава на Фејсбук, Марјан Забрчанец, Националниот координатор за Отворен Балкан и за регионални иницијативи.
„Честитки за сите, ова голем ден за македонската и регионалната економија. Благодарност до одговорните пратеници кои гласаа ЗА“, истакна Забрчанец.
Како што е предвидено, рече Забрчанец, во текстот „Регионалниот пазар на трудот како придобивка на Отворен Балкан ќе донесе и раст на платите“, Договорот за услови за слободен пристап до пазарот на трудот во Западен Балкан и Договорот за интерконекција на шеми за електронска идентификација на граѓаните од Западен Балкан ќе им овозможат на граѓаните од трите земји да работат во која било од нив без посебни работни дозволи, без какви било бариери, без аплицирања и чекања, без административни трошоци. Дополнително олеснување ќе обезбедат и договорите за признавање на дипломи и професионални квалификации.
„Огромен е интересот кај бизнис секторот за оваа економска поволност. Постојано добиваме повици од стопанските комори и фирмите од трите држави, бараат час поскоро да почне да се спроведува мерката. Најзаинтересирани се компаниите во ИТ секторот, туризмот и приватното здравство, како и одредени угостителски гранки кои со ова ќе можат да привлечат работници и да отворат нови работни места“, истакна националниот координатор за Отворен Балкан и регионални иницијативи Забрчанец, пред изгласување на ратификациите на законите од Отворен Балкан во Собранието.
Собранието денеска, во рамки на 103. седница, донесе повеќе одлуки: за разрешување и избор на членови на Советот за научно-културните средби „Десет дена Крушевска Република”, за именување претседател и членови на Одборот за доделување на државната награда „23 Октомври”, за распишување јавен оглас за назначување претседател и членови на Советот за граѓански надзор, за објавување јавен оглас за именување на член на Комисијата за заштита на конкуренција, како и за објавување јавен оглас за именување член на Државната комисија за жалби по јавни набавки.
Пратениците ги донесоа и одлуките за објавување јавни огласи за избор на членови на Комисијата за спречување и заштита од дискриминација, за избор на членови на Државниот совет за превенција на детско престапништво, за избор на заменик-директор на Агенцијата за заштита на личните податоци, како и за избор на здруженија од областа на човековите права, полициското право и правосудството за механизмот за граѓанска контрола во состав на Народниот правобранител.
Донесена беше и Одлуката за изменување на Одлуката за основање на пратенички групи на Собранието на Република Северна Македонија за соработка со парламенти на други држави и избор на претседатели и членови на пратеничките групи на Собранието на Република Северна Македонија за соработка со парламенти на други држави.
На дневен ред беа и Предлог-законот за ратификација на Договорот за техничка соработка меѓу Владата на Република Северна Македонија и Владата на Јапонија, како и Предлог-законот за ратификација на Протоколот за вода и здравје на Конвенцијата од 1992 година за заштита и користење на прекуграничните водотеци и меѓународни езера, но за нив не се расправаше зашто, како што објасни претседателот на Собранието Талат Џафери, не се поминати на соодветните собраниски комисии.
Откако дневниот ред беше исцрпен до 12. точка, Џафери ја прекина седницата и даде десет минути пауза за пратениците да се подготват за продолженијата за 99. и 84. седница. Продолжението на 103. седница, рече, ќе биде дополнително закажано.
Пратениците ја почнаа седницата со оддавање почит на настраданите во земјотресите во Турција и Сирија, со едноминутно молчење.
