Последната изјава на Руската Федерација во врска со нејзините намери да стационира тактичко нуклеарно оружје на територијата на Белорусија е уште еден провокативен чекор на криминалниот режим на Путин, кој ги поткопува основните принципи на Договорот за неширење на нуклеарното оружје, архитектурата на нуклеарното разоружување и меѓународниот безбедносен систем како целина, соопшти Министерството за надворешни работи на Украина.
„Ваквите намери не можат а да не предизвикаат загриженост за целата меѓународна заедница, по изјавите од Русија во услови на продолжување на нејзината неиспровоцирана воена агресија против Украина. И покрај ужасните злосторства против човештвото и воените злосторства извршени од Кремљ како дел од нејзината воена агресија против една суверена нација, Русија го демонстрира својот неуспех да надвладее на бојното поле“, се вели во соопштението на украинското МНР.
Украина упати апел и до белоруското општество да го спречи исполнувањето на овие криминални цели, со распоредувањето нуклеарно оружје на територијата на Белорусија, што е спротивно на нејзините обврски од Договорот за неширење на нуклеарно оружје, што дополнително ќе ја претвори оваа земја во заложник на Кремљ и ќе доведе до катастрофални последици за нејзината иднина.
Понатаму, украинското МНР апелира и до земјите од Групата седум и Европската унија да ги предупредат белоруските власти за далекусежните последици за Белорусија, доколку се согласи да прифати тактичко нуклеарно оружје од Русија на нејзина територија.
„Украина очекува ефективни мерки на спротивставување на нуклеарната уцена на Кремљ. Обединетото Кралство, Кина, САД и Франција, особено како постојани членки на Советот за безбедност на ОН, имаат примарна одговорност за спречување на закани од агресија со употреба на нуклеарни оружје. Бараме веднаш да се свика вонреден состанок на Советот за безбедност на ОН за таа цел“, се нагласува во соопштението на МНР на Украина.
Украина ги повика сите членови на светската заедница да заземат цврст став и силно да отфрлат уште една нуклеарна провокација од страна на криминалниот режим на Путин и да преземат решителни мерки за ефективно да ја одвратат и спречат секоја можна употреба на нуклеарно оружје од страна на државата агресор.
„Русија уште еднаш ја потврдува својата хронична неспособност да биде одговорен поседувач на нуклеарно оружје како средство за одвраќање и спречување на војна, а не како алатка за закани и заплашување. Светот мора да се обедини против оној кој ја загрозува иднината на човечката цивилизација“, соопштува Министерството за надворешни работи на Украина.