Полскиот Сенат бара брз пристап на Украина во НАТО преку вонредна процедура

Украина денес ја има најсилната армија на континентот со извонредно борбено искуство“, се вели во резолуцијата со која полскиот Сенат повикува Украина да биде примена во НАТО по вонредна процедура, како Финска и Шведска.

Како што пренесува Еуромаиданпрес, полскиот Сенат едногласно усвои резолуција за членство на Украина во НАТО, пренесува Polskie Radio. Резолуцијата ги истакнува безбедносните гаранции, „вонредната процедура“ за пристапување во НАТО, самитот во Вилнус и поддршката за Украина.

„По една година ужасна војна, знаеме дека Украина, спротивставувајќи се на Русија, ја брани Европа и е клучна алка која го штити континентот од агресија од Исток“, се вели во резолуцијата. Таа ја признава значајната воена сила на Украина, која е усовршена преку долгогодишното борбено искуство.

Во резолуцијата се наведува:

„Украина денес ја има најсилната армија на континентот со извонредно борбено искуство“, дека украинската армија брзо се вооружува со технологијата на НАТО и применува воена оперативна уметност и тактика што се развивале со децении меѓу западните сојузници.

Документот ја нагласува потребата од „вистинска поддршка“ за украинските бранители, што може да се постигне преку поблиска политичка и воена соработка со земјите-членки на НАТО.

Резолуцијата го нагласува самитот на Алијансата во Вилнус како „значајна фаза во подготовката на Украина за полноправно членство“. Полскиот Сенат смета дека пристапувањето на Украина во Алијансата треба да биде „политичка одлука“, како што беше случајот со Финска и Шведска, и тоа треба да произлезе од стратешката анализа на „предизвиците и заканите надвор од источната граница на Алијансата“.

Резолуцијата го повикува НАТО да ги примени истите „вонредни процедури“ за Украина што беа користени за пристапување на Финска и Шведска во Алијансата.

„Иако Шведска останува надвор од структурите на Алијансата, сојузниците одлучија да ја заштитат. Сенатот на Република Полска ги повикува земјите-членки на НАТО да применат слична вонредна процедура за Украина“, се вели во документот.

Сенатот, исто така, ги поддржа барањата на земјите кои граничат со Русија за „силни безбедносни гаранции за Украина“ и демонстрација на патот на Украина кон членство во НАТО. На 20 април 2023 година, генералниот секретар на НАТО Столтенберг изјави дека Алијансата се подготвува да и одговори на Украина во врска со членството на самитот во Вилнус.

Украинската амбасадорка во земјава, Лариса Дир, на својот Твитер профил ја поздрави одлуката на полскиот Сенат.

Сенатот на Полска усвои одлука со која ги повикува земјите-членки на НАТО да применат итна постапка за Украина ,како што беше со Финска и Шведска – ова треба да биде политичка одлука – како резултат на стратешка анализа на предизвиците и заканите надвор од источната граница на НАТ, пишува Дир во објавата.

Подготви: Д. Мишев / Цивил Медиа